کراچی: بلدیاتی نمائندوں کی تقریب حلف برداری کے دوران اس وقت دل چسپ صورت حال پیدا ہو گئی جب امیر جماعت اسلامی کراچی حافظ نعیم الرحمان نے انگریزی میں حلف اٹھانے سے انکار کر دیا۔
تفصیلات کے مطابق کراچی سمیت سندھ بھر میں تمام بلدیاتی عہدیداروں نے حلف اٹھا لیا، نارتھ ناظم آباد ٹاؤن میں تقریب حلف برداری میں اس وقت دل چسپ صورت حال پیدا ہو گئی جب حافظ نعیم نے انگریزی میں حلف اٹھانے سے انکار کیا۔
امیر جماعت اسلامی کراچی نے کہا قومی زبان کو عزت دیجیے، تاہم اسسٹنٹ کمشنر حازم بھنگوار نے فرمائش کی کہ 2 منٹ لگیں گے، انگریزی میں ہی کر لیجیے، حافظ نعیم نے پھر بھی اردو میں ہی حلف کے الفاظ ادا کیے۔
25 ٹاؤنز کے نمائندوں کی مختلف مقامات پر حلف برداری کی تقریبات منعقد ہوئیں، ڈسٹرکٹ سینٹرل میں پی ٹی آئی کے ارکان حلف برداری میں شریک نہیں ہوئے، ضلع شرقی کی ٹاؤن میونسپل کارپوریشن گلشن اقبال اور صفورہ کے منتخب ارکان کی حلف برداری بھی مکمل ہو گئی۔ چینسر ٹاون، لیاری ٹاؤن کے منتخب چیئرمین، وائس چیئرمین اور جنرل کونسلر نے بھی حلف اٹھایا۔
سکھر سمیت سندھ کے دیگر اضلاع میں بھی میونسپل کارپوریشن، ٹاؤن کونسل، ضلع کونسل، ڈسٹرکٹ کونسل اور یونین کونسل کے تمام بلدیاتی نمائندوں کے لیے مختلف مقامات پر تقریب حلف برداری کا انعقاد کیا گیا۔
