دنیا بھر سے لاکھوں فرزندان اسلام حج کی سعادت حاصل کرنے کیلئے مناسک حج ادا کرنے میں مصروف ہیں، ایسے میں اطلاعات سامنے آرہی ہیں کہ منیٰ میں پاکستانی عازمین کو شدید مشکلات کا سامنا ہے۔
اطلاعات کے مطابق پاکستانی حجاج کرام کو منیٰ میں مکتب فراہم نہیں کیا گیا جبکہ پاکستان کیلئے مختص مکتب میں دیگر ممالک کے عازمین موجود ہیں۔
خیمے نہ ملنے کی وجہ سے پاکستانیوں نے پورا دن کڑی دھوم میں گزارا، عازمین بسوں اور خیموں کے باہر بیٹھے رہے جب کہ عازمین حج کو کھانا بھی فراہم نہیں کیا گیا۔
یہ بھی شکایات سامنے آئی ہیں کہ منیٰ میں پاکستانی حج رضا کار بھی موجود نہیں، جس کے باعث پاکستان عازمین حج کو شدید مشکلات کا سامنا کرنا پڑ رہا ہے۔
واضح رہے کہ عازمین حج گزشتہ روز منیٰ پہنچے، رات کو وہیں قیام کیا، عازمین آج حج وقوف عرفہ کیلئے میدان عرفات روانہ ہونگے۔
مسجد نمرہ میں امام کعبہ خطبہ حج دیں گے، اس کے بعد عازمین حج مزدلفہ میں مغرب، عشا کی نمازیں ایک ساتھ اداکرینگے۔
حجاج کرام مزدلفہ سے رمی کے لئے کنکریاں اکٹھی کریں گے، 10ذی الحجہ کو نماز فجر کی ادائیگی کے بعد عازمین جمرات روانہ ہوجائیں گے۔
حج کا رکنِ اعظم وقوفِ عرفہ آج ادا کیا جائے گا
جمرات پر شیطان کو کنکریاں مارنے کے بعد حجاج قربانی کرینگے، اس کے بعد احراموں کو کھول دیا جائے گا۔
