حلب : کہتے ہیں کہ ایک تصویر ایک ہزار الفاظ سے زیادہ پر تاثیر ہوتی ہے۔ شامی شہر حلب میں اپنے بھائی کے غم میں بلکتے دو بھائیوں کی ویڈیو نے دنیا کو رلا کر رکھ دیا۔
تفصیلات کے مطابق پھوٹ پھوٹ کر روتے یہ دونوں بچے سگے بھائی ہیں۔ دھول سے اٹے ان کے چہروں پر خوف کے لہراتے سائے نمایاں ہیں۔
بمباری میں زندہ بچ جانے والے دونوں بچے روتے ہوئے ایک دوسرے سے لپٹ کر اپنے تیسرے بھائی کو یاد کر رہے ہیں جو اتنا خوش قسمت نہیں تھا کہ زندہ رہ پاتا۔
ان کا ایک بھائی بمباری میں جاں بحق ہوگیا تھا، وہ کبھی گھر کے آنگن میں اِن کے ساتھ کھیلا کرتا تھا۔ اب تو وہ گھر ہی نہیں رہا جس کے آنگن میں تینوں بھائیوں کا شور گونجتا تھا۔
مزید پڑھیں : شام : حلب پر بیرل بم حملہ، 11 بچوں سمیت 15 شہری جاں بحق
شام کے شہر حلب پر ہونے والی تباہ کن فضائی بمباری نے شہر کی گلیاں کھنڈر بنا دیں۔ تیرہ معصوم بچے اس حملے میں جان کی بازی ہار گئے۔
گزشتہ ہفتے بھی حلب پر فضائی حملے کے بعد ایک ایمبولینس میں ساکت بیٹھے پانچ سالہ عمران کی تصویر نے بھی دنیا کو دہلا دیا تھا۔ کوئی صاحب دل ایسا نہ ہوگا جس نے ان بھائیوں کے درد اور زخمی عمران کے سکوت کو محسوس نہ کیا ہو۔
