غزہ میں جنگ بندی کے لیے کوششیں تیز ہو گئی ہیں، حماس نے جنگ بندی کے لیے قطر اور مصر کی مجوزہ تجاویز کا جواب دے دیا۔
غیر ملکی میڈیا رپورٹس کے مطابق حماس نے مجوزہ غزہ جنگ بندی پلان پر اپنا جواب دے دیا ہے، قطری وزیر اعظم اور امریکی وزیر خارجہ انٹونی بلنکن نے معاہدے کے فریم ورک سے متعلق حماس کا جواب ملنے کی تصدیق کر دی ہے۔
دوحا میں قطری وزیر اعظم کے ساتھ مشترکہ پریس کانفرنس میں انٹونی بلنکن کا کہنا تھا کہ حماس کے جواب کا جائزہ لیا جا رہا ہے، اور اس پر اسرائیل سے بات کریں گے، امید ہے معاہدہ ممکن ہو جائے۔
پریس کانفرنس میں پوچھے جانے پر قطری وزیر اعظم نے کہا کہ اس نازک وقت میں معاہدے کے فریم ورک کی تفصیلات نہیں بتا سکتے۔
ویڈیو: برطانوی ساحل پر غزہ کے 12 ہزار شہید بچوں کے ساتھ رقت آمیز اظہار یکجہتی
روئٹرز کے مطابق یہ تجاویز تقریباً ایک ہفتہ قبل حماس کو بھیجی گئی تھیں لیکن حماس نے جواب دینے کے لیے منگل تک کا وقت لے لیا تھا کیوں کہ حماس کے مطابق معاہدے کے کچھ حصے ’غیر واضح اور مبہم‘ تھے۔
حماس کے ایک سینیئر اہلکار نے بی بی سی کو بتایا کہ انھوں نے اپنے ’مثبت نقطہ نظر‘ کے تحت غزہ کی تعمیر نو، رہائشیوں کی اپنے گھروں کو واپسی اور زخمیوں کے علاج اور بیرون ملک اسپتالوں میں منتقلی کے حوالے سے ترامیم شامل کی ہیں۔
امریکی وزیر خارجہ انٹونی بلنکن آج بدھ کو اسرائیل میں حکام کے ساتھ حماس کے ردعمل پر بات کریں گے، قطری وزیر اعظم شیخ محمد بن عبدالرحمن الثانی نے حماس کے ردعمل کو عمومی طور پر ’مثبت‘ قرار دیا ہے۔
