لاہور: پنجاب اسمبلی میں اپوزیشن لیڈر حمزہ شہباز کا کہنا ہے کہ میں اور میرے والد 150 پیشیاں بھگت چکے ہیں۔
احتساب عدالت میں رمضان شوگر ملز کیس کی سماعت کے بعد میڈیا سے گفتگو کرتے ہوئے حمزہ شہباز نے کہا کہ میں اور میرے والد 150 پیشیاں بھگت چکے ہیں، ان کا اصل چہرہ اللہ نے بے نقاب کیا ہے۔
حمزہ شہباز نے کہا کہ مسلم لیگ (ن) کے دورِ حکومت میں کرپشن کا انڈیکس 127 سے 117 ہوا، ہماری حکومت میں موٹرویز بنیں اور بجلی کے اربوں کے منصوبے لگے۔
مزید پڑھیں: شہباز شریف اور حمزہ شہباز سے متعلق تحریری حکم جاری
انہوں نے مزید کہا کہ پاکستان میں کسان آج کھاد کی بوری کے لیے لائنوں میں لگ رہے ہیں، یہ حقیقت ہے عمران نیازی کے افسانے نہیں ہیں، کرپشن کے خاتمے کا ایجنڈا لے کر آنے والی جماعت کے دور میں کرپشن بڑھی، عمران نیازی ڈھٹائی سے کہتا ہے ٹرانسپرنسی انٹرنشنل رپورٹ نہیں مانتا۔
اپوزیشن لیڈر نے کہا کہ اپوزیشن نے جتنی پیشیاں بھگتنی تھیں بھگت لیں، اب عمران نیازی کی پیشی عوام کی عدالت میں ہوگی۔
خیال رہے کہ رمضان شوگر ملز ریفرنس میں حمزہ شہباز نے نیب ترمیمی آرڈیننس سے فائدہ نہ لینے کا فیصلہ کرتے ہوئے بریت کی درخواست واپس لے رکھی ہے۔
حمزہ شہباز نے اپنی بریت کی درخواست واپس لیتے ہوئے کہا تھا کہ یہ فیصلہ وکلا کا تھا، میں میرٹ پر بریت کی درخواست کرنا چاہتا ہوں، ترمیمی آرڈیننس کے تحت کوئی فائدہ نہیں چاہتا، اللہ اور اس عدالت پر مکمل اعتماد ہے۔
