رہنما مسلم لیگ ن حنیف عباسی نے کہا ہے کہ بلاول لاہور سے ایک بھی نشست لے جائیں تو بڑی بات ہوگی۔
تفصیلات کے مطابق اے آر وائی کے پروگرام خبر میں گفتگو کرتے ہوئے حنیف عباسی کا کہنا تھا کہ بلاول بھٹو پی ڈی ایم کی اتحادی حکومت میں شامل تھے۔ ان کے پاس وزارت تھی تمام فیصلوں میں شامل تھے۔ بلاول نے اسمبلی میں ہی کہا شہباز شریف میرے وزیراعظم ہیں۔
سینئر رہنما ن لیگ نے کہا کہ آج بلاول شہباز شریف پر تنقید کررہے ہیں۔ ان کی آج کی گفتگو پر یقین کریں یا اسمبلی والی گفتگو پر۔
حنیف عباسی نے کہا کہ نواز شریف کا مینار پاکستان پر تاریخ کا سب سے بڑا جلسہ تھا۔ نواز شریف ایک برانڈ ہیں اور برانڈ کو پروموشن کی ضرورت نہیں۔
انھوں نے کہا کہ بلاول بھٹو کیا بیچ رہے ہیں، جو وہ بیچ رہے ہیں کوئی نہیں خرید رہا۔ بلاول نواز شریف کا مقابلہ نہیں کرسکتے اس لیے تنقید کررہے ہیں۔ وہ خود کہتے ہیں کہ نواز چوتھی مرتبہ وزیراعظم بن رہے ہیں۔ نواز شریف کوئی نوٹیفکیشن کے ذریعے وزیراعظم نہیں بن رہے۔
حنیف عباسی نے کہا کہ بلوچستان، کے پی اور سندھ میں ن لیگ بڑا نمبر لے جائے گی۔ 10، 20 لوگ چاہیے ہونگے تو وہ بھی آجائیں گے۔ ہم مطمئن ہیں بڑا نمبر لے کرجائیں گے۔
ن لیگی رہنما نے کہا کہ نواز شریف چوتھی مرتبہ پاکستان کے وزیراعظم بننے جا رہے ہیں۔ وہ ایک برانڈ بن چکے ہیں، 4 سال جلاوطن رہے۔
انھوں نے کہا کہ نوازشریف واپس آئے تو بڑا جلسہ کیا،عوام نے استقبال کیا۔ ن لیگ کے وزارت عظمیٰ کے امیدوار نوازشریف ہی ہیں۔
حنیف عباسی نے کہا کہ آصف زرداری کو صدر کے عہدے پر بھی نہیں دیکھ رہا۔ پیپلز پارٹی سندھ سے بھی غائب ہورہی ہے۔ وہ سندھ سے بھی نہیں جیتےگی۔ سندھ میں پیپلزپارٹی کی نہیں اتحادی حکومت ہوگی۔
پاکستان مسلم لیگ ن کے رہنما کا کہنا تھا کہ ہم جیتیں یا نہیں پیپلزپارٹی سندھ سے نہیں جیتے گی۔ مریم نواز کے عہدے سے متعلق پارٹی نے ابھی فیصلہ نہیں کیا۔
انھوں نے کہا کہ مریم نواز وزیراعلیٰ پنجاب بھی نامزد ہوئیں تو ویلکم کریں گے۔ اسحاق ڈار نے ملک کو دیوالیہ ہونے سے بچایا، کابینہ میں آنا چاہیے۔
