قومی ٹیم کے نوجوان اوپنر حسن نواز کی کامیابی پر والدین خوشی سے نہال ہیں۔

اے آر وائی نیوز سے گفتگو کرتے ہوئے حسن نواز کی والدہ نے کہا کہ صبح سے بچوں کو دعائیں کرنے مسجد بھیجا ہوا تھا، بیٹے کو کرکٹ سے جنون کی حد تک پیار ہے اس لیے کامیاب ہوا۔

والد نے کہا کہ ہم پسماندہ علاقے کے لوگ ہیں، یہاں سے انٹرنیشنل کرکٹر کا آنا بہت بڑی بات ہے، اللہ نے عزت دی ہے۔

آکلینڈ میں کھیلے گئے تیسرے ٹی 20 میچ میں پاکستان نے نیوزی لینڈ کو 9 وکٹوں سے شکست دی، پاکستان نے کیویز کی جانب سے دیا جانے والا 205 رنز کا ہدف 16ویں اوور میں حاصل کرلیا۔

22 سالہ حسن نواز نے آکلینڈ میں کھیلے گئے تیسرے ٹی ٹوئنٹی میچ میں  44 گیندوں پر سنچری بنائی، ان کی اننگز میں 10 چوکے اور 7 چھکے شامل تھے۔

حسن نواز نے 105 رنز کی ناقابلِ شکست اننگز کھیلی اور وہ شاندار بیٹنگ کارکردگی پر پلیئر آف دی میچ قرار پائے۔

واضح رہے کہ پانچ میچوں کی ٹی 20 سیریز میں نیوزی لینڈ کو پاکستان کے خلاف 2-1 کی برتری حاصل ہے۔