پاکستان ٹیم کے نوجوان بیٹر حسن نواز کا کہنا ہے کہ بیٹنگ کے دوران سلمان آغا کو کہا کہ میچ فنش کریں مجھے سنچری کا شوق نہیں۔
آکلینڈ میں میڈیا سے گفتگو کرتے ہوئے نوجوان بیٹر حسن نواز نے کہا کہ سنچری کے وقت سلمان آغا کو کہا تھا آپ میچ فنش کریں سنچری آگے بھی کرسکتا ہوں میچ جیتنا زیادہ ضروری ہے۔
انہوں نے کہا کہ جب دو میچوں میں آؤٹ ہوا تو دباؤ میں تھا یہی سوچ رہا تھا کہ ڈومیسٹک کرکٹ میں جاکر پرفارم کروں گا اور خامیوں پر قابو پاؤں گا۔
حسن نواز کے مطابق آج بھی یہی سوچا تھا کہ پہلا سنگل کرنا ہے، سنگل کرتے ہی دباؤ ختم ہوگیا جس کے بعد اپنی اننگز کھیلی، جمی نیشم کو چھکا مار کر نصف سنچری مکمل کرنے والا شاٹ بہترین تھا۔
نوجوان بیٹر نے کہا کہ اسپنرز پر اٹیک کرنا فاسٹ بولرز کی نسبت آسان ہوتا ہے، اس طرح کا اعتماد ملنے سے آپ کچھ بھی کرسکتے ہیں، آج کی کامیابی ٹیم ورک کا نتیجہ ہے جو غلطیاں کی ہیں ان سے سیکھ رہے ہیں۔
انہوں نے کہا کہ سنچری والد صاحب کے نام کروں گا جو میرے لیے ہمیشہ دعا کرتے ہیں، میرا تعلق لیہ کی مڈل کلاس فیملی سے ہے، کرکٹ کا کوئی بیک گراؤنڈ نہیں، دو مرتبہ جب آؤٹ ہوا سلیکٹڑ حسن چیمہ کا پیغام آیا اور کہا پتا ہے تم ضرور اسکور کرو گے۔
حسن نواز نے کہا کہ ان کے اعتماد دینے کا شکریہ، عاقب جاوید نے بھی کہا تھا چاہے تم پانچ زیرو بھی کرو گے تو کھیلو گے۔
