اہور: قومی کرکٹ ٹیم کے فاسٹ بولر حسن علی نے ٹی ٹوینٹی اسکواڈ میں منتخب نہ ہونے والے کھلاڑیوں کے لیے حوصلہ افزا پیغام جاری کردیا۔
اے آر وائی نیوز کے مطابق کرکٹر حسن علی نے ورچوئل کانفرنس کی۔ جس میں انہوں نے عبدالقدیر خان کے انتقال پر افسوس کا اظہار کیا اور انہیں خراج تحسین بھی پیش کیا۔
ٹی ٹوینٹی ورلڈکپ کے حوالے سے گفتگو کرتے ہوئے اُن کا کہنا تھا کہ ورلڈکپ میں بھارت اور نیوزی لینڈ کے میچز بہت اہم ہیں، ہم دونوں میچز کے لئے خاص پلان کریں گے اور ٹیموں کو آسان نہیں لیں گے، بھارت کے خلاف جیت کے ساتھ میگا ایونٹ کا آغاز کریں گے، نیوزی لینڈ کی ٹیم کے ملتوی دورے کی وجہ سے بھی اس میچ کا تذکرہ ہوگا، ہم بھارت اور نیوزی لینڈ کو شکست دینے کی بھرپور کوشش کریں گے۔
حسن علی نے کہا کہ ہر میچ کا پریشر ہوتا ہے، ایسا نہیں ہے کہ دباؤ نہیں ہوتا مگر ہم پروفیشنل ہیں تو اس صورت حال سے نکلنا اچھے طریقے سے جانتے ہیں، میگا ایونٹ سے پہلےمینجمنٹ تبدیلی نہیں ہونی چاہئے تھی، وقار یونس کو ہی بولنگ کوچ ہونا چاہئے تھا کیونکہ ہم نے اُن سے بہت کچھ سیکھا۔
فاسٹ بولر نے کہا کہ ہم سو فیصد دیں گے رزلٹ ہمارے ہاتھ میں نہیں لیکن پوری کوشش کریں گے ، مجھے یقین ہے کہ ہم اچھا کھیل کر ٹرافی جیتیں گے، میں نے جیت کا دعویٰ نہیں کیا لیکن ہم ٹرافی حاصل کرنے کی پوری کوشش کریں گے، متحدہ عرب امارات (یو اے ای) میں کرکٹ کھیل کر ساری ٹیمیں کنڈیشنز کی عادی ہوچکی ہیں۔
حسن علی کا کہنا تھا کہ میں کبھی فٹنس ٹیسٹ میں فیل نہیں ہوا، ابھی ہمارے پاس تیار ی کا وقت ہے، کوشش ہوگی جہاں خامیاں ہیں اُن پر قابو پالیں، ٹیم میں تاخیر سے تبدیلیوں کی وجہ سے فرق نہیں پڑے گا کیونکہ ہمارا اچھا کمبی نیشن بنے گا۔
انہوں نے کہا کہ سینئرز کا کردار بڑا اہم ہوتا ہے، یہ بہت اچھا ہے کہ ہمارے پاس تین چار بڑے سینئرز ہیں، میری کوشش ہوتی ہے کہ میں بولنگ میں لیڈ کروں‘۔
حسن علی نے صہیب مقصود کے ان فٹ ہونے پر افسوس کا اظہار کیا اور اسکواڈ میں شامل نہ ہونے والے لڑکوں سے کہا کہ ’ڈراپ ہونے والے ہمت نہ ہاریں جلد ان کا کم بیک ہو گا، وہ خود کو مضبوط رکھیں‘۔
