ایچ بی ایل پاکستان سپر لیگ 9 کا آغاز ہفتہ 17 فروری سے ہو رہا ہے لیگ کی مقبول ترین فرنچائز کراچی کنگز کے شیر اپنا رنگ جمانے کیلیے آج ملتان روانہ ہوں گے۔
اے آر وائی نیوز کے مطابق ایچ بی ایل پاکستان سپر لیگ کے نویں سیزن کا باقاعدہ آغاز ہفتہ 17 فروری سے ہو رہا ہے۔ افتتاحی میچ دفاعی چیمپئن لاہور قلندرز اور اسلام آباد یونائیٹڈ کے درمیان قذافی اسٹیڈیم میں کھیلا جائے گا۔
پی ایس ایل کی مقبول ترین فرنچائز کراچی کنگز کے شیر لیگ کے نویں ایڈیشن میں دھاڑنے کے لیے بے قرار ہیں اور اپنا رنگ جمانے کے لیے آج ملتان روانہ ہوں گے، غیر ملکی کھلاڑی وہیں اسکواڈ جوائن کریں گے۔
کراچی کنگز کے مقامی کھلاڑیوں نے دو روز شہر قائد میں جم کر پریکٹس کی جس میں کوچز کی نگرانی میں پاور ہٹنگ پر خاص توجہ دی گئی۔ کنگز کے ہیڈ کوچ فل سمنز نے کھلاڑیوں سے کہہ دیا ہے کہ خوب محنت کریں اور کھیل کو انجوائے کریں۔
کراچی کے شیر اتوار 18 فروری کو اپنے پہلے مقابلے میں ملتان کے سلطانوں سے ٹکرائیں گے۔
کراچی کنگز کی نئی مینجمنٹ اور نیا کمبی نیشن ہے۔ کپتان شان مسعود کو نوجوان کھلاڑیوں سے بڑی امیدیں ہیں جب کہ آل راؤنڈر محمد نواز نے کراچی کو چیمپئن بنوانے اور ٹورنامنٹ کا بہترین کھلاڑی بننے کے ہدف کا تعین کر لیا ہے۔
پی ایس ایل 9 کی چمچاتی ٹرافی سے پردہ ہٹا دیا گیا، پروقار تقریب رونمائی
واضح رہے کہ گزشتہ روز لاہور کے پولو گراؤنڈ میں پروقار تقریب منعقد ہوئی تھی جس میں پی ایس ایل 9 کی ٹرافی کی رونمائی کی گئی تھی۔
