سر میں جوئیں یا لیکھیں نہ صرف خواتین بلکہ کافی حد تک مردوں اور بچوں کا بھی مسئلہ ہے، اس صورتحال کے پیش نظر لوگوں کو بعض اوقات شرمندگی کا بھی سامنا کرنا پڑ جاتا ہے۔
اسی شرمندگی سے بچنے کیلئے لوگ جوؤں اور لیکھوں سے چھٹکارے کیلئے مختلف طریقے تیل اور ادویات استعمال کرتے ہیں۔
اس حوالے سے اے آر وائی نیوز کے پروگرام باخبر سویرا میں ڈرما ٹولوجسٹ ڈاکٹر کاشف ملک نے ناظرین کو جوؤں سے نجات کیلئے مفید اور مؤثر مشورے دیئے۔ انہوں نے بتایا کہ ایک بات یہ بھی عام ہوگئی ہے کہ جوؤں کے بڑھنے کی وجہ موبائل فون ہے کیونکہ سیلفی لیتے ہوئے لوگوں کے سر بہت قریب ہوجاتے ہیں۔
انہوں نے بتایا کہ ’پرمیتھرین‘ نامی لوشن لائیں اور رات کو سونے سے پہلے سر میں اچھی طرح لگائیں اور تقریباً 8سے 12 گھنٹے بعد صبح اچھے سے شیمپو سے بال دھولیں۔
ڈاکٹر کاشف ملک ایک اور نسخہ بتاتے ہوئے کہا کہ تھوڑا سا ناریل کا تیل گرم کریں اور بالوں کی جڑوں میں اچھی طرح لگائیں اس سے جوئیں مر جاتی ہیں، ان کا کہنا تھا کہ ماؤں کو بھی چاہیے کہ وہ بچوں کو پاس بٹھا کر ان کے سر میں کنگھی کریں اور جوؤیں دیکھیں۔
انہوں نے کہا کہ اسکول جانے والے بچوں کو بھی سمجھائیں کہ وہ ایک دوسرے کے سروں کو ملا کر رکھنے سے باز رہیں، اس کے علاوہ صفائی کا خاص خیال رکھتے ہوئے اپنا کنگھا اور تولیہ بھی الگ رکھیں۔
