زمبابوے کرکٹ ٹیم کے سابق کپتان اور ملک کی جانب کے سب سے زیادہ وکٹ لینے والے کھلاڑی ہیتھ اسٹریک جگر اور کینسر سے لڑتے ہوئے 49 سال کی عمر میں زندگی کی جنگ ہار گئے۔
ان کی اہلیہ نے سوشل میڈیا پر پیغام میں لکھا کہ آج صبح 3 ستمبر بروز اتوار میری زندگی کی سب سے بڑی محبت اور میرے خوبصورت بچوں کے والد خاندان کے ساتھ آخری ایام گزارتے ہوئے چل بسے۔
زمبابوے کے سابق کپتان ہیتھ اسٹریک کینسر میں مبتلا تھے رواں برس مئی میں سابق کھلاڑی کو کینسر کی تشخیص ہوئی تھی۔
ہیتھ اسٹریک 100 وکٹیں لینے والے زمبابوے کے پہلے بولر ہیں، انہوں نے 65 ٹیسٹ اور 189 ون ڈے میچز کھیلے۔
ہیتھ اسٹریک نے 2000 سے 2004 تک زمبابوے ٹیم کی قیادت کی، انہوں نے 445 انٹرنیشنل وکٹیں حاصل کیں اور 4933 رنز بنائے۔
انہوں نے ٹیسٹ میں 22.35 کی اوسط سے 1,990 رنز بنائے اور ملک کی آل ٹائم فہرست میں ساتویں نمبر پر رہے۔ ان کا سب سے زیادہ اسکور اور واحد سنچری 2003 میں ہرارے میں ویسٹ انڈیز کے خلاف 127 (ناٹ آؤٹ) تھی۔
بطور کپتان 21 ٹیسٹ میں ان کی چار فتوحات کی خاص بات زمبابوے کی 2001 میں ہرارے میں بھارت کے خلاف پہلی ٹیسٹ فتح تھی۔ انہوں نے میچ میں سات وکٹیں حاصل کیں، دونوں اننگز میں سچن ٹنڈولکر کو آؤٹ کیا، اور پہلی اننگز میں 40 رنز بنائے۔
انہوں نے 68 ون ڈے میچوں میں زمبابوے کی قیادت کی، جس میں جنوبی افریقہ میں 2003 کا ورلڈ کپ بھی شامل ہے جب زمبابوے سپر سکس مرحلے میں پہنچا تھا۔
