ریاض: سعودی محکمہ موسمیات نے مملکت کے مختلف شہروں میں تیز بارشوں کی پیش گوئی کردی۔
عرب میڈیا کے مطابق محکمہ موسمیات نے امکان ظاہر کیا ہے کہ آج سے مختلف شہروں اور ریجنوں میں گرج چمک کے ساتھ بارشوں کا امکان ہے جبکہ تیز ہوائیں بھی چلیں گی۔
سعودی شہر مکہ، الباحہ، عسیر اور جازان کے مختلف علاقوں میں موسلا دھار بارش کی توقع ہے۔
جبکہ ریاض اور قصیم ریجنز میں تیز ہواوں کے ساتھ گردو غبار بھی چھایا رہے گا جس سے حد نگاہ متاثر ہونے کا امکان ہے، ڈرائیور حضرات احتیاط برتیں۔
اسی طرح مدینہ ریجن میں بھی تیز ہوا چلنے کا امکان ہے جبکہ ریجن میں مطلع آبرآلود رہے گا۔
سعودی محکمہ شہری دفاع نے ہدایت کی ہے کہ موسم کی خرابی کے سبب مذکورہ علاقوں میں شاہراہوں پر سفر کرنے والے خصوصی احتیاطی تدابیر اختیار کریں تاکہ کسی مشکل میں مبتلا نہ ہوں۔
جبکہ پہاڑی علاقوں میں تفریح کے لیے جانے والے نشیبی مقامات پر پڑاو سے گریز کریں اور ندی نالوں کے علاوہ برساتی پانی کی گزرگاہوں سے دور رہیں۔
