ایبٹ آباد: گلیات میں رات گئے شدید برف باری ہوئی ہے، جب کہ سوات میں 4 روز بعد برف باری کا سلسلہ تھم گیا ہے۔
تفصیلات کے مطابق ایبٹ آباد کے علاقوں گلیات، نتھیاگلی، چھانگلہ گلی، نگری ٹوٹیال، بینانی میں شدید برفباری ہوئی ہے، برفباری سے علاقے کے عوام کو دشواری کا سامنا کرنا پڑ رہا ہے۔
برفباری شروع ہوتے ہی علاقے میں بجلی کی آنکھ مچولی بھی شروع ہو گئی ہے، برف باری سے رابطہ سڑکیں بھی بلاک ہو گئیں، گزشتہ رات کی شدید برف باری سے پہاڑوں نے بھی سفید چادر اوڑھ لی۔
ادھر سوات میں چار روز بعد برف باری کا سلسلہ تھم گیا ہے، کالام میں تین فٹ تک برف پڑ چکی ہے، جب کہ مالم جبہ، کالام اور دیگر علاقوں میں سیاحوں نے ڈھیرے ڈال دیے ہیں۔
برفباری کے موسم میں گلیات کی جانب اور برفانی علاقوں میں جاتے ہوئے چند احتیاطی تدابیر ضرور اختیار کریں۔#Islamabad #Police #TravelAdvisory #Murree #SnowSeason #ICTP pic.twitter.com/VHhFoFKpfk
— Islamabad Police (@ICT_Police) January 31, 2024
دوسری طرف محکمہ موسمیات کا کہنا ہے کہ آج گلگت بلتستان، بالائی خیبر پختون خوا، اسلام آباد، خطہ پوٹھوہار، شمال مشرقی پنجاب اور کشمیر میں مطلع ابر آلود رہنے کا امکان ہے، تیز ہواؤں اور گرج چمک کے ساتھ بارش اور پہاڑوں پر برف باری ہو سکتی ہے، ملک کے دیگرعلاقوں میں موسم سرد رہے گا، جب کہ پنجاب اور بالائی سندھ کے بعض علا قوں میں دھند کا امکان ہے۔
