ممبئی: نامور بھارتی فلمساز سنجے لیلا بھنسالی کی ویب سیریز ’ہیرا منڈی‘ کے مزید چار کرداروں سے پردہ اٹھا دیا گیا جن میں فردین خان بھی شامل ہیں۔
سنجے لیلا بھنسالی پروڈکشن نے سوشل میڈیا پر ویب سیریز کے مزید چار کرداروں کا تعارف شیئر کر دیا۔ ویب سیریز یکم مئی سے مقبول ویڈیو اسٹریمنگ پلیٹ فارم نیٹ فلکس پر نشر کی جائے گی۔
بھنسالی پروڈکشن نے اعلان کیا کہ ویب سیریز میں فردین خان بھی نظر آئیں گے۔ یاد رہے کہ بالی وڈ اداکار کی 14 سال بعد اسکرین پر واپسی ہوگی جس کیلیے ان کے مداح پُرجوش ہیں۔
View this post on Instagram
پوسٹر میں فردین خان کو شاہانہ انداز میں دیکھا جا سکتا ہے جن کے سامنے زیورات سے بھری ٹرے موجود ہے۔ اداکار ’ہیرا منڈی‘ میں ولی محمد کا کردار ادا کریں گے۔
اداکار شیکھر سمن اور ان کا بیٹا ادھیان سمن بھی ’ہیرا منڈی‘ کی کاسٹ میں شامل ہیں۔ ویب سیریز میں شیکھر سمن کو نواب کے کردار میں دکھایا گیا جہاں ان کے چہرے پر فخر کے تاثرات عیاں ہیں۔
View this post on Instagram
ساتھ ہی ان کے بیٹے ادھیان سمن کا پوسٹر بھی جاری کیا گیا جس میں وہ زورآور کا کردار نبھائیں گے۔
View this post on Instagram
علاوہ ازیں، اداکار تاہا شاہ ’ہیرا منڈی‘ میں تاجدار کا کردار ادا کریں گے۔ پوسٹر میں وہ اپنے ہاتھوں میں سفید فیتے والا رومال لے کر دیوار سے ٹیک لگائے نظر آ رہے ہیں۔
View this post on Instagram
فروری میں ’ہیرا منڈی‘ کا پہلا ٹیزر جاری کیا گیا تھا جسے سوشل میڈیا پر کافی سراہا گیا۔
ویب سیریز میں سوناکشی سنہا، ادیتی راؤ حیدری، منیشا کوئرالا، شرمین سہگل، سنجیدہ شیخ اور ریچا چڈھا بھی مرکزی کردار ادا کریں گی۔
ہیرا منڈی مغل دور میں لاہور کا ایک ایسا علاقہ رہا ہے جہاں طوائفیں رہا کرتی تھیں اور وہاں رقص و گیت کی محفلیں آراستہ ہوتی تھیں۔
فلمساز سنجے لیلا بھنسالی نے اپنے ایک بیان میں کہا تھا کہ ’ہیرا منڈی‘ میں دکھایا جائے گا کہ ماضی میں جسم فروشی کے اڈوں پر کس طرح آرٹ اور ثقافت کی ترویج ہوتی تھی اور کس طرح وہیں سیاست پلتی اور بڑھتی تھی۔
View this post on Instagram
