بیروت: لبنان میں حزب اللہ ارکان کے زیر استعمال مواصلاتی آلات میں دھماکوں سے جاں بحق افراد کی تعداد 20 ہو گئی ہے۔
لبنانی وزارت صحت کے مطابق بیروت کے مضافاتی علاقوں اور وادی بیکا میں واکی ٹاکی دھماکوں میں حزب اللہ کے جاں بحق ارکان کی تعداد بڑھ کر بیس ہو گئی ہے، جب کہ دھماکوں سے ساڑھے چار سو سے زائد افراد مختلف اسپتالوں میں زیر علاج ہیں۔
واکی ٹاکی میں نصب دھماکا خیز مواد اتنا طاقت ور تھا کہ گاڑیوں اور موٹر سائیکلیں آگ لگنے سے تباہ ہو گئیں، گزشتہ روز بھی ایک دھماکا شہید ہونے والے حزب اللہ ممبر کے جنازے میں ہوا تھا، دوسری طرف پیجر پھٹنے سے لبنانی وزیر کے بیٹے سمیت 12 افراد جاں بحق ہوئے تھے، ان میں دو بچے بھی شامل ہیں۔
پیجر دھماکوں میں ایرانی سفیر مجتبیٰ امانی سمیت 4 ہزار سے زائد افراد زخمی ہیں، جب کہ زخمیوں میں 400 کی حالت تشویش ناک ہے۔
روئٹرز کا کہنا ہے کہ بدھ کا روز لبنان کے لیے سب سے تباہ کن دن ثابت ہوا جب اسرائیل کے ساتھ ایک سال قبل شروع ہونے والی جھڑپوں کے بعد اچانک لبنان کے جنوب میں جگہ جگہ ہاتھوں میں پکڑ کر رابطہ کاری کے لیے استعمال ہونے والے ریڈیو میں دھماکے ہونے لگے۔
اسرائیلی حکام نے ان دھماکوں پر کوئی تبصرہ نہیں کیا ہے تاہم سیکیورٹی ذرائع کا کہنا ہے کہ اسرائیل کی جاسوسی ایجنسی موساد اس کے لیے ذمہ دار ہے۔ حزب اللہ کے ایک اہلکار نے کہا کہ یہ واقعہ گروپ کی تاریخ کی سب سے بڑی سیکیورٹی ناکامی ہے۔
