اسلام آباد: ہائرایجوکیشن کمیشن نے تمام تعلیمی اداروں میں ہولی کی تقریبات پر پابندی عائد کرنے کا جاری کردہ اپنا ہی نوٹیفکیشن واپس لے لیا۔
گزشتہ روز ہائر ایجوکیشن کمیشن نے تمام تعلیمی اداروں میں ہولی کی تقریبات پر پابندی عائد کرنے کا نوٹیفکیشن جاری کیا تھا جس میں ایچ ای سی نے کہا تھا کہ اس طرح کی سرگرمیاں ملک کی سماجی و ثقافتی اقدار سے مکمل طور پر لاتعلقی کو ظاہر کرتی ہیں اور اسلامی تشخص کو نقصان پہنچاتی ہیں۔
تاہم اب ہائر ایجوکیشن کمیشن نے گزشتہ روز جاری کردہ اپنا ہی نوٹیفکیشن واپس لے لیا، نوٹیفکیشن کے مطابق ایچ ای سی کے ہدایت نامہ کو غلط انداز میں پیش کیا گیا۔
جاری کردہ نوٹیفکیشن میں کہا گیا کہ ایچ ای سی تمام مذاہب، افراد وگروپس کے مذہبی عقائد کا احترام کرتا ہے، ایچ ای سی ملک میں منائے جانے والے مذہبی تہواروں کو آزادی سے منانے پر یقین رکھتا ہے۔
نوٹیفکیشن میں کہا گیا کہ ایچ ای سی کے ہدایت نامہ کو پابندی سمجھا گیا، کیمپسز میں مذہبی عقائد اور ملکی نظریہ کے مطابق ہر طالب علم کو تقریبات کی آزادی حاصل ہے۔
نوٹیفکیشن میں کہا گیا کہ چونکہ ایچ ای سی کے پیغام کا غلط مطلب لیا گیا ہے اس لیے نوٹیفکیشن واپس لیا جاتا ہے۔
