اسلام آباد: ملک بھر میں کرونا وائرس کیسز میں ہوش ربا اضافہ جاری ہے، مثبت کیسز کی بلند ترین شرح شہر قائد میں رپورٹ کی گئی۔
تفصیلات کے مطابق صوبہ سندھ کے دارالحکومت کراچی میں کرونا وائرس کیسز کی بلند ترین یومیہ شرح ریکارڈ کی جارہی ہے، گزشتہ 24 گھنٹے کے دوران کراچی میں کرونا کیسز کی شرح 30.83 فیصد رہی۔
اسی طرح لاہور میں بھی بلند شرح دیکھی جارہی ہے، گزشتہ 24 گھنٹے میں لاہور میں کرونا کیسز کی شرح 13.05 فیصد ریکارڈ کی گئی۔
گزشتہ 24 گھنٹے میں حیدر آباد میں کرونا کیسز کی شرح 10.68 فیصد، اسلام آباد میں 10.75 فیصد، راولپنڈی میں 8.84 فیصد، پشاور میں 7.49 فیصد، میر پور میں 5.95 فیصد، مظفر آباد میں 4.55 فیصد اور نوشہرہ میں 3.62 فیصد ریکارڈ کی گئی۔
کوئٹہ میں کرونا وائرس کیسز کی شرح 1.91 فیصد، صوابی میں 1.85 فیصد، گجرات میں 1.74 فیصد، ایبٹ آباد میں 1.42 فیصد، جہلم میں 1.15 فیصد، مردان میں 0.87 فیصد اور بنوں میں 0.62 فیصد ریکارڈ کی گئی۔
24 گھنٹے کے دوران 5 اضلاع میں کرونا وائرس کیسز کی شرح 1 فیصد سے کم ریکارڈ کی گئی جبکہ گلگت، اسکردو اور دیامر میں کوئی کووڈ 19 کیس رپورٹ نہیں ہوا۔
خیال رہے کہ گزشتہ 24 گھنٹوں کے دوران ملک بھر میں کرونا وائرس کے 4 ہزار 340 کیسز رپورٹ ہوئے ہیں، کرونا کے مثبت کیسز کی شرح 8.71 فیصد تک جا پہنچی ہے۔
