شہد میں شفا ہے یہ وہ جملہ ہے جو ہم میں سے اکثر لوگوں نے سن رکھا ہے لیکن اس ایک جملے کے پیچھے برسوں کی محنت، تحقیق اور تجربات شامل ہیں۔
تاہم مسلمان اس حوالے سے خوش نصیب واقع ہوئے ہیں کہ انہیں چودہ سو سال قبل ہی آخری الہامی کتاب کے ذریعے شہد کے فوائد اور انفرادیت کا پتہ چل گیا تھا جب خالقِ کائنات نے خود یہ فرمایا کہ
( وَاَوْحٰی رَبُکَ اِلَی النَّحْلِ اَنِ ا تَّخِذِیْ مِنَ الْجِبَالِ بُیُوْتاً وَّ مِنَ الشَّجَرِوَمِمَّا یَعْرِشُوْن . ثُمَّ کُلِیْ مِنْ کُلِّ الثَّمَرٰتِ فَا سْلُکِیْ سُبُلَ رَبِّکِ ذُلُلاً ْ یَخْرُ جُ مِنْ بُطُوْنِہَا شَرَاب مُّخْتَلِف اَلْوَانُہ فِیْہِ ِشفَآءُ لِّلنَّاس ط اِنَّ فِیْ ذٰلِکَ لَاٰ یَةً لِّقَوْمٍ یَّتَفَکَّرُوْنَ)
” نیز آپ کے پروردگار نے شہد کی مکھی کی طرف وحی کی کہ پہاڑوں میں ،درختوں میں ، اور (انگور وغیرہ کی )بیل میں اپنا گھر (چھتا)بنا۔پھرہر قسم کے پھل سے اس کا رس چوس اور اپنے پروردگار کی ہموار کردہ راہوں پر چلتی رہ۔ان مکھیوں کے پیٹ سے مختلف رنگوں کامشروب (شہد)نکلتا ہے جس میں لوگوں کے لیے شفا ہے۔یقینا اس میں بھی ایک نشانی ہے ان لوگوں کے لیے جو غورو فکر کرتے ہیں۔”(2)
شہد کا استعمال بیماریوں سے نجات
ماہرین طب شہد کے استعمال کو بیماریوں سے محفوظ رہنا کا آسان ذریعہ بتاتے ہیں اور ماہرین غذا کے نزدیک تو شہد اُن تمام لوازمات اور وٹامنز سے بھرپور ہے جس کی ہمارے جسم کو ضرورت ہوتی ہے۔
یہ زود ہضم بھی ہے اور پُر تاثیر بھی، یہ اپنے اندر شفا بھی سمیٹے ہوئے ہے تو یہ لذیذ اور مرغوب غذا بھی ہے غرض یہ غذا اور غذائیت کے جملہ اوصاف کا کماحقہ احاطہ کیے ہوئے ہے۔
شہد اور بالوں کی نگہداشت
فی زمانہ بالوں کا جھڑنا خواتین کا ہی نہیں بلکہ مردوں کا مشترکہ ’’غم ‘‘ بن چکا ہے کیوں کہ گرتے بالوں کو ڈھلتی عمر کا آئینہ دار قرار دیا جاتا ہے لہذا مرد و خواتین کے اس مشترکہ ’’غم‘‘ کو شہد سے دور کرنے کے لیے کچھ مفید معلومات پیش کی جا رہی ہیں۔
بالوں کے لیے بہترین کنڈیشنر
شہد بالوں کے لیے بہترین کنڈیشنر ثابت ہوا ہے جس کے استعمال سے بالوں کے روکھے پن کو دور کر کے بالوں تر و تازہ اور جگمگاتا ہوا بناتا ہے۔
بس آپ نے کرنا یہ ہے دو کپ گرم پانی میں دو چمچ شہد کو ملا لیں، آپ کا کنڈیشنر تیار ہے اور بالوں کو شیمپو سے دھونے کے بعد اس کنڈیشنر سے دھولیں آپ کو کسی اور کنڈیشنر کی ضرورت نہیں رہے گی۔
بالوں کو مضبوط، صحت مند اور چمک دار بنائے
دوچمچ شہد اور دو کپ گرم پانی کے ساتھ ملے اس مرکب کو بہ طور کنڈیشنر کے استعمال کریں اور اپنے بالوں کو دھول، مٹی اور دیگر فضائی آلودگیوں سے محفوظ بنا کر بالوں کو مضبوط اور چمکدار بنائیں۔
شہد بالوں کو ڈائی بھی کرتا ہے
شہد کا کیمیائی تجزیہ کرنے پر پتہ چلتا ہے کہ اس میں قدرتی طور پر ایک جز گلوکوز آکسائیڈ ہوتا ہے جو شہد کو میٹھا بناتا ہے لیکن جدید تحقیق سے ثابت ہوا ہے کہ شہد کو بالوں میں لگا کر کچھ دیر کے چھوڑ دیا جائے تو شہد میں موجود گلوکوز آکسائیڈ ایک اور کیمیائی جز ہائیڈروجن پروآکسائیڈ خارج کرنا شروع کردیتا ہے جو قدرتی طور پر بالوں کو رنگ دیتا ہے۔
شہد کو بہ طور کلر ڈائی کے استعمال کرنے کے لیے تین چمچ شہد کو دو چمچے پانی میں ملا کر لیپ بنا لی جائے اور پھر اسے گیلے بالوں میں لگا کر ایک گھنٹے کے لیے چھوڑ دیں اور پھر دھولیں۔
جراثیم کش ہے
شہد چوں کہ جراثیم کو ختم کرنے کی صلاحیت رکھتا ہے اس لیے اسے بہ طور کنڈیشنر یا بالوں کو رنگنے کے لیے استعمال کرنے پر یہ سر کی جلد کو مختلف قسم کے انفیکشن سے محفوظ رکھتا ہے۔
بالوں سے خشکی کو دور کرے
شہد جراثیم کش اثرات رکھتا ہے اس لیے یہ سر سے خشکی اور سکری کو دور رکھنے کے لیے اہم کردار ادا کرتا ہے اس کے علاوہ سر کی جلد میں ہونے والے انفیکشن، سوزش اور فنگس کو بھی دور کرتا ہے جب کہ بالوں سے لیکھوں اور جوؤں کا خاتمہ بھی کرتا ہے ۔
شہد ۔۔۔ اینٹی آکسائیڈنٹس سے بھرپور
شہد میں موجود اینٹی آکسائیڈنٹس بالوں کو جواں اور توانا بناتا ہے اور اس کے مسلسل استعمال سے شہد بالوں کی جڑوں کو مضبوط کرتے ہوئے انہیں گرنے سے روک دیتا ہے۔
شہد کے استعمال سے نئے بال اُگ آئیں گے
بالوں کے لیے شہد کو بہ طور شیمپو، کنڈیشنر اور ہیئر کلر کے مسلسل استعمال سے یہ بات دیکھنے میں آئی ہے کہ شہد بالوں کو نہ صرف یہ کہ گرنے سے روکتا ہے بلکہ اس کی مدد سے نئے بال بھی اگنے لگتے ہیں اور جلد ہی گنج دور ہو جاتی ہے.
