ہانگ کانگ نے مالی بوجھ کو کم کرنے میں مدد کے لیے مستقل رہائشیوں کو تقد رقوم اور ٹیکس چھوٹ دینے کا اعلان کردیا۔
غیرملکی خبررساں ادارے کی رپورٹ کے مطابق ہانگ کانگ حکومت نے سالانہ بجٹ کے ایک حصے کے طور پر 18 سال سے زائد عمر کے تقریباً 70 لاکھ افراد کو 10 ہزار ڈالر دینے کا فیصلہ کیا ہے۔
ہانگ کانگ کی معیشت کرونا وائرس کی وجہ سے مشکلات کا شکار ہے، کئی مہینوں کی پرتشدد سیاسی بدامنی سے ہانگ کانگ کی معیشت کو بھی نقصان پہنچا ہے۔
واضح رہے کہ ہانگ کانگ میں کرونا وائرس سے 2 افراد ہلاک اور مجموعی طور پر 81 افراد متاثر ہیں۔
فنانس سیکریٹری ہانگ کانگ پال چن کا کہنا تھا کہ معیشت کو اس سال بہت بڑے چیلنجوں کا سامنا ہے۔
ان کا کہنا ہے کہ ہم نے 18 سال اور اس سے بڑی عمر کے مستقل شہریوں کے لیے 10 ہزار ہانگ کانگ ڈالر فراہم کرنے کا فیصلہ کیا ہے، جو ان کا مالی بوجھ دور کرے گا اور ساتھ ہی مقامی اخراجات کے لیے حوصلہ مند ثابت ہوگا۔
ہانگ کانگ حکومت کی جانب سے تنخواہ اور جائیداد میں ٹیکس چھوٹ دینے کے اعلان کے ساتھ رہائشی کرائے کم کرنے کا اعلان بھی کیا گیا۔
