اسلام آباد: وفاقی وزیر مواصلات مراد سعید نے کہا کہ 11ارب 90 کروڑ احتساب کی مد میں ریکور کیے گئے۔
تفصیلات کے مطابق وفاقی وزیر مراد سعید نے میڈیا سے گفتگو کرتے ہوئے کہا کہ کرونا کے باعث مستحق خاندانوں کے لیے فی کس 12 ہزار روپے امداد رکھی،مشکل وقت میں ملکی تاریخ کا سب سے بڑا ریلیف پیکج دیا۔
انہوں نے بتایا کہ پبلک پرائیویٹ پارٹنرشپ کے تحت بڑے منصوبے شروع کیے، سندھ،جنوبی پنجاب،کے پی میں منصوبوں کو ترجیح دی گئی،اس کے علاوہ سی پیک کے مغربی روٹ پر بھی خصوصی توجہ دی گئی۔
حکومت کی کفایت شعاری مہم کا ذکر کرتے ہوئے مراد سعید کا کہنا تھا کہ وزیراعظم آفس کے اخراجات میں پہلے سال30 کروڑ کی بچت کی گئی جبکہ دوسرے سال18 کروڑ کی بچت کی۔
وفاقی وزیر نے میڈیا سے گفتگو کے دوران بتایا کہ 11ارب 90 کروڑ احتساب کی مد میں ریکور کیے گئے۔انہوں نے بتایا کہ مغربی روٹ پر کام شروع کردیا گیا ہے، سندھ،بلوچستان،جنوبی پنجاب کے57 منصوبے ہیں۔
مراد سعید کا کہنا تھا کہ جن علاقوں میں آبادی زیادہ ہے ان کو موٹروے ملنے جا رہا ہے،پورا پنجاب اب موٹر ویز کے ساتھ منسلک ہو جائے گا، جی ٹی روڈ کے علاقوں کو موٹرویز سے منسلک کیا جائے گا۔
