لاہور : ایف آئی اے ملتان نے انسانی اسمگلنگ میں ملوث مزید 3 ملزمان کو گرفتار کرلیا، جنہوں نے سادہ لوح شہریوں کو یورپ کا جھانسہ دے کر کروڑوں روپے بٹورے تھے۔
تفصیلات کے مطابق ایف آئی اے انسداد انسانی اسمگلنگ سیل ملتان کے عملے نے کامیاب کارروائی کرتے ہوئے 3 ملزمان کو گرفتار کرلیا۔
ایف آئی اے انسداد انسانی اسمگلنگ سیل کے مطابق گرفتار ملزمان میں جاوید اقبال، شفقت شہزاد اور محمد آصف شامل ہیں، ملزمان کو خانیوال اور مظفر گڑھ سے گرفتار کیا گیا۔
حکام کے مطابق ملزم جاوید شہریوں سے عمرہ ادائیگی کیلئے 24 لاکھ وصول کرکے روپوش تھا، ملزم شفقت اور محمد آصف نے بیرون ملک ملازمت کا جھانسہ دے کر لوگوں سے پیسے بٹورے۔
ایف آئی اے سیل کا کہنا ہے کہ ملزمان نے یو اے ای ملازمت کے لئے 8 لاکھ روپے وصول کیے، ملزمان کیخلاف امیگریشن آرڈیننس کے تحت مقدمات درج کیے گئے ہیں۔
دوسری جانب کراچی میں ایف آئی اے انسداد انسانی ا سمگلنگ سیل نے کلفٹن سے انسانی اسمگلر الطاف حسین کو گرفتار کرلیا، ملزم نے شہری کو کینیڈا کے بھجوانے کے لئے 50 لاکھ روپے کا تقاضہ کیا اور 16 لاکھ روپے وصول بھی کئے، ملزم سے تفتیش کا آغاز کر کے دیگر ملزمان کی گرفتاری کے لئے چھاپے مارے جا رہے ہیں۔
