برازیلیا: برازیل میں 4 سالہ بچے نے اپنی والدہ کے فون کا استعمال کرتے ہوئے تقریباً 12 ہزار روپے کا کھانا آن لائن آرڈر کرکے والدہ کو حیران کردیا۔
غیرملکی خبررساں ادارے کی رپورٹ کے مطابق برازیلی خاتون رائیسا ونڈرایڈ نے سماجی رابطے کی ویب سائٹ انسٹاگرام پر اپنے 4 سالہ بچے کی معصومانہ حرکت کا احوال بیان کیا۔
خاتون نے بچے کی تصویر شیئر کرتے ہوئے لکھا کہ ’ان کے چار سالہ بیٹے نے ان کا موبائل فون استعمال کرتے ہوئے ایک معروف اور مہنگی فوڈ چین سے 400 برازیلین رئیل (12 ہزار پاکستانی روپے) کا کھانا آرڈر کردیا۔‘
برازیلی خاتون نے واقعے کو ناقابل یقین قرار دیتے ہوئے کہا کہ ’یہ پہلی بار نہیں ہوا ہے کہ ان کے بیٹے نے آن لائن کھانا آرڈر کیا ہے وہ اس قسم کی شرارت کرتا ہی رہتا ہے۔‘
انہوں نے کھانے کی تفصیل بتاتے ہوئے لکھا کہ اتنا سارا اور مہنگا کھانا دیکھنے کے بعد وہ ہنستے اور روتے ہوئے کھانا کھانے بیٹھ گئی تھیں۔
رائیسا ونڈرایڈ کی پوسٹ کو صارفین نے پسند کیا اور کمسن بچے کی شرارت پر دلچسپ تبصرے بھی کیے جارہے ہیں۔
