پشاور : پولیس اسٹیشن پہاڑی پورہ کی حدود میں سٹی پیٹرول پولیس یونٹ پر نامعلوم افراد کی فائرنگ سے ایک اہلکار شہید جب کہ 2 زخمی ہوگئے ہیں۔
تفصیلات کے مطابق پشاور میں متعارف کی گئی نئی سٹی پیٹرول پولیس یونٹ پر نا معلوم افراد نے حملہ کردیا جس کے نتیجے میں ایک اہلکار شہید اور دو اہلکار شدید زخمی ہو گئے ہیں جب کہ ملزمان بآسانی فرار ہونے میں کامیاب ہو گئے ہیں۔
ذرائع کے مطابق شہید ہونے والے اہلکار کی شناخت اے ایس آئی عصمت خان کے نام سے ہوئی ہے جب کہ زخمی ہونے والے افراد کو لیڈی ریڈنگ اسپتال پشاور میں طبی امداد دی جا رہی ہے جن کی عیادت کے لیے اعلیٰ پولیس افسران پہنچ گئے ہیں۔
ایس ایس پی آپریشن کا کہنا ہے کہ دہشت گردی کا افسوسناک واقعے میں پولیس اہلکاروں کو دورانِ ڈیوٹی نشانہ بنایا گیا جس میں ایک اہلکار شہید اور دو زخمی ہو گئے ہیں۔
واقعہ کی اطلاع ملنے کے بعد پشاور پولیس نے پہاڑی پورہ کے علاقے کا محاصرہ کرلیا ہے اور ہر آنے جانے والی گاڑی کی تلاشی لی جا رہی ہے جب کہ مختلف علاقوں میں سرچ آپریشن جا ری ہے جس کے دوران کئی مشتبہ افراد میں حراست میں لے لیا گیا ہے۔
