لندن: ایم کیو ایم کے سنیئر رہنماء سلیم شہزاد نے کہا ہے کہ ڈاکٹر فاروق ستار اور رابطہ کمیٹی کے فیصلے کی تائید کرتا ہوں اور اُن کو مضبوط کرنے کے لیے جلد پاکستان آرہا ہوں۔
ان خیالات کا اظہار انہوں نے سماجی رابطے کی ویب سائٹ پر ٹوئٹس کے ذریعے کیا، اُن کا کہنا ہے کہ فاروق ستار اور رابطہ کمیٹی کے فیصلے کی تائید کرتا ہوں‘‘۔ سلیم شہزاد نے مزید کہا کہ ’’میرے لیے سب سے پہلےپاکستان ہے بس یہی میرا پہلا اور آخری کہنا ہے۔
اُنہوں نے کہا کہ ’’مجھ سمیت تمام سنیئر ایم کیو ایم کے کارکنان پاکستان سے محبت کرتے ہیں اور ہم کراچی کے حالات خراب کرنے کی کسی کو اجازت نہیں دیں گے‘‘۔ سلیم شہزاد کا کہنا تھا کہ ’’ہمیشہ وطن سے محبت کی ہے اور سب سے پہلے پاکستان ہی ہے، پاکستان سب سے پہلے ہی بس یہی میرا حتمی فیصلہ بھی ہے‘‘۔
یاد رہے گزشتہ روز کراچی پریس کلب پر قائد ایم کیو ایم کی متنازعہ تقریر کے بعد ایم کیو ایم کے کئی رہنماؤں نے سماجی رابطوں کی ویب سائٹ پر پاکستان زندہ باد کے نعرے لکھے، علاوہ ازیں ایم کیو ایم صوبائی اسمبلی کے حلقہ 105 سے تعلق رکھنے والے ممبر اسمبلی خالد بن ولایت نے پاک سرزمین پارٹی میں شمولیت اختیار کی اور اسمبلی کی خاتون رکن ارم عظیم فاروقی نے بھی استعفیٰ دینے کا اعلان کیا تھا۔
