دبئی : دنیائے کرکٹ کا سب سے بڑا مقابلہ ’پاک بھارت ٹاکرا‘ آج دبئی میں ہوگا، آئی سی سی چیمپئنز ٹرافی 2025 میں دونوں بڑے حریف آمنے سامنے ہوں گے۔
آئی سی سی چیمپئنز ٹرافی 2025 کے 5ویں میچ میں آج بروز اتوار 23 فروری کو دبئی انٹرنیشنل کرکٹ اسٹیڈیم میں روایتی حریف پاکستان اور بھارت آمنے سامنے ہوں گے۔
اگر گزشتہ میچوں کی بات کی جائے تو اب تک پاکستان اور بھارت کے درمیان135ون ڈے میچز ہوچکے ہیں۔ جن میں پاکستان بھارت کے خلاف73ون ڈے میچ جیت چکا ہے جبکہ بھارت پاکستان کے خلاف57ون ڈے میچ جیت چکا ہے۔ دونوں کے درمیان 5ون ڈے کا کوئی نتیجہ نہیں نکلا۔
چیمپئنز ٹرافی میں مجموعی طور پر پاک بھارت ٹاکرا 5 بار ہوچکا ہے، پاکستان چیمپئنز ٹرافی میں بھارت کے خلاف 3میچز جیت چکا، بھارت چیمپئنز ٹرافی میں پاکستان کے خلاف 2 میچز جیت چکا پاکستان گزشتہ 5ون ڈے میچز میں بھارت جیت نہیں سکا ہے۔
اس کے علاوہ دبئی اسٹیڈیم پر پاکستان اور بھارت کی ٹیموں کے درمیان اب تک 58ون ڈے میچ کھیلے جا چکے ہیں۔
دبئی اسٹیڈیم میں پہلے بیٹنگ کرنے والی ٹیم 22بار کامیاب ہوئی، دبئی میں دوسری باربیٹنگ کرنے والی ٹیم نے 34بار میچ جیتا، دبئی اسٹیڈیم میں ٹیموں نے صرف 4بار300سے زائد رنز بنائے۔
اس میدان میں سب سے بڑا ہدف287 رنز سری لنکا نے پاکستان کے خلاف حاصل کیا، دبئی میں روہت شرما نے بھارت کی طرف سے سب زیادہ رنز اسکور کیے۔
دبئی کے گراؤنڈ پر 6 میچوں میں روہت شرما نے 358 رنز اسکور کیے جبکہ پاکستان کی جانب سے بابراعظم نے سب زیادہ رنز اسکور کیے۔
بابراعظم نے دبئی کے 6 میچوں میں 335 رنز اسکور کیے، ایک سنچری بنائی، دبئی کرکٹ گراؤنڈ پر پاکستان 22 میچ کھیل چکا ہے، بھارت دبئی میں کوئی میچ نہیں ہارا، 7 میں سے 6 جیتا ایک میچ ٹائی ہوا۔
