The news is by your side.

Advertisement

آئی سی سی رینکنگ میں بابر اعظم کا بڑا اعزاز

دبئی: انٹر نیشنل کرکٹ کونسل نے ٹی ٹوئنٹی، ٹیسٹ اور ون ڈے کرکٹ کی تازہ ترین رینکنگ جاری کر دی ہے۔

تفصیلات کے مطابق آئی سی سی کی جانب سے جاری تازہ ترین ٹیسٹ رینکنگ میں بلے بازوں کی فہرست میں نیوزی لینڈ کے کین ولیمسن پہلی پوزیشن پر براجمان ہیں، آسٹریلیا کے اسٹیو اسمتھ دوسرے جبکہ قومی ٹیم کے کپتان بابر اعظم ساتویں درجے پر موجود ہیں۔

ٹیسٹ بولرز کی رینکنگ میں آسٹریلیا کے پیٹ کمنز کی نمبر ون پوزیشن برقرار ہے، بھارت کے روی چندر اشون دوسرے جبکہ نیوزی لینڈ کے نیل وینگر تیسرے نمبر پر موجود ہیں، بولرز کی ٹاپ ٹین رینکنگ میں کوئی بھی پاکستانی بولرز شامل نہیں۔

آئی سی سی کی جانب سے جاری ٹی ٹوئنٹی رینکنگ میں انگلینڈ کے ڈیوڈمیلان پہلے، کینگروز کے ایرون فنچ دوسرے جبکہ قومی ٹیم کے مایہ ناز بلے باز بابراعظم تیسرے نمبر پر براجمان ہیں۔

مختصر فارمیٹ کی بولنگ رینکنگ میں جنوبی افریقہ کے تبریز شمسی کا پہلا نمبر ہے، افغانستان کے راشد خان دوسرے نمبر پر موجود ہیں، کوئی بھی پاکستانی بولرز ٹی ٹوئنٹی کی ٹاپ ٹین میں جگہ نہیں بناسکا ہے۔

ٹی ٹوئنٹی کی آل راؤنڈ کٹیگری میں افغانستان کے محمد بنی پہلی پوزیشن پر آگئے ہیں جبکہ بنگلہ دیش کے شکیب الحسن ایک درجے تنزلی کے بعد دوسرے نمبر پر موجود ہیں، گذشتہ ٹی ٹوئنٹی رینکنگ میں پانچویں نمبر پر موجود قومی ٹیم کے آل راؤنڈر عماد وسیم ٹاپ ٹین کی فہرست سے باہر ہوگئے ہیں۔

یہ بھی پڑھیں:  بابر اعظم جنوبی افریقہ پر قہر ڈھانے کو تیار

آئی سی سی کی جان سے ایک روزہ میچز کی بھی تازہ ترین رینکنگ جاری کی گئی ہے، جس میں بھارتی کپتان ویرات کوہلی پہلے جبکہ قومی ٹیم کے کپتان بابراعظم دوسرے نمبر پر موجود ہیں، بابراعظم کے علاوہ کوئی دوسرا پاکستانی بلے باز ٹاپ ٹین میں موجود نہیں ہے۔

بولرز کی کٹیگری میں پاکستانی فاسٹ بولر محمد عامر نویں پوزیشن پر موجود ہیں جبکہ نیوزی لینڈ کے ٹرینٹ بولٹ پہلی پوزیشن پر قابض ہیں، آل راؤنڈر کی کٹیگری میں بنگلہ دیش کے شکیب الحسن پہلے جبکہ انگلینڈ کے بین اسٹوک دوسرے نمبر پر قابض ہیں، پاکستان کے عماد وسیم پانچویں پوزیشن پر موجود ہیں۔

Comments

یہ بھی پڑھیں