کراچی: دفاعی نمائش آئیڈیاز 2024 کے 12ویں ایڈیشن میں آئی جی سندھ غلام نبی میمن نے جدید ٹیکنالوجی، ہتھیاروں اور دیگر ساز و سامان میں خصوصی دلچسپی لیتے ہوئے اعلیٰ پولیس افسران پر مشتمل ایک ٹیم بنائی جس کا کام تمام اسٹالز کا وزٹ کر کے ہتھیاروں کی خریداری کی فہرست مرتب کرنا تھا۔
اعلیٰ پولیس ذرائع کے مطابق اعلیٰ پولیس افسران کی ٹیم نے جدید ڈرونز اے پی سیز اسکینرز اور دیگر مصنوعات پر ریسرچ کر کے ایک خریداری کی سفارش کیلیے ایک لسٹ بنائی ہے جس کی کچھ تفصیلات ہم نے حاصل کیں۔
فہرسٹ کے مطابق دو مختلف قسم کے ڈروزنز جس میں ایک سرویلنس ڈرون ہوگا جو کسی ایک مقام پر پرواز کرے گا اور مخصوص ایریا میں موجود تمام افراد کی جیوفینسنگ کر سکے گا، غیر مجاز شخص یا گاڑی دیکھتے ہی الارم کے ذریعے آگاہی دے گا۔
دوسرا ڈرون لا اینڈ آرڈر کنٹرول کرنے کیلیے خریدا جائے گا جو ہنگامی صورتحال کی جگہ پر بھیجا جائے گا جس میں بیک وقت 5 سے 6 آنسو گیس شیل اٹھانے کی صلاحیت ہوگی اور مظاہرین منتشر کرنے کیلیے پن پوائنٹ پر شیل کو گرایا جا سکے گا۔
کمانڈ اینڈ کنٹرول سسٹم والی اے پی سی خریدنے کی بھی سفارش کی جائے گی جس میں بیٹھ کر تمام صورتحال کو مانیٹر کر سکتے ہیں جو کچے کے آپریشن میں مددگار ثابت ہوگی۔
اس کے علاوہ، دو مختلف اقسام کے جدید اسکینرز خریدنے کی بھی تجویز دی جائے گی جس میں ایک موبائل ایک فکس اسکینر شامل ہے۔
فکس اسکینر سے سڑک پر موجود ہر گاڑی کو اسکین کیا جا سکے گا اس اسکینر اسپیشل میٹل گریڈ ٹیکنالوجی سے فوری کسی بھی دھات کی ڈیٹیکشن ہو سکے گی۔
کراچی پولیس کیلیے میگنافائن ویپن خریدنے کی سفارش کی جائے گی جس سے گولی نشانے پر لگنے کی صلاحیت 10 گنا بڑھ جائے گی۔
پولیس پروکیورمنٹ ٹیم کی جانب سے آئی جی سندھ غلام نبی میمن کو فہرست دی جائے گی جس کے بعد وہ اس فہرست کو حتمی شکل دے کر بجٹ جاری کرنے کیلیے سندھ حکومت کے سامنے پیش کریں گے۔
