پاکستان کے پارلیمانی وفد کی قیادت کرنے والے بلاول بھٹو نے کہا ہے کہ برطانیہ اگر جیٹ طیارے دے تو ان کا بہترین استعمال کر سکتے ہیں۔
بلاول بھٹوزرداری نے برطانوی تھنک ٹینک آئی آئی ایس ایس سےخطاب کرتے ہوئے کہا کہ چاہتے ہیں بھارت کشمیر کی آئینی حیثیت کی تبدیلی کا فیصلہ واپس لے پاکستان بھارت سے غیرمشروط مگر جامع مذاکرات چاہتا ہے۔
انہوں نے کہا کہ مودی پاکستان کے عوام کا دشمن ہے پانی کی بندش اس کا ثبوت ہے، کشمیر کا مسئلہ تقسیم ہند کا نامکمل ایجنڈا ہے بھارت کی جانب سےپانی بندکرنےکی دھمکی قابل مذمت ہے۔
اس سے قبل غیر ملکی ٹی وی چینل کو انٹرویو کے دوران سابق وزیر خارجہ بلاول بھٹو کا کہنا تھا کہ جارحانہ رویے اور سندھ طاس معاہدے کی ممکنہ معطلی پر شدید تحفظات ہیں۔
انہوں نے واضح کیا کہ بھارت سندھ طاس معاہدے کو یکطرفہ طور پر معطل نہیں کر سکتا، اور ایسا کوئی بھی اقدام عالمی قوانین کی سنگین خلاف ورزی تصور ہوگا۔
بلاول بھٹو نے کہا کہ پانی کو ہتھیار کے طور پر استعمال کرنا اعلان جنگ کے مترادف ہوگا، پاکستان ایک ذمہ دار ایٹمی ریاست ہے اور ہمیشہ امن کے پیغام کا علمبردار رہا ہے۔
بلاول کا کہنا تھا کہ تمام مسائل کا مستقل اور پائیدار حل مسئلہ کشمیر سے جڑا ہوا ہے۔ پاکستان نے ہمیشہ سفارت کاری سے مسائل کے حل کی بات کی۔ لیکن پانی جیسے بنیادی انسانی حق پر کسی قسم کا کوئی سمجھوتہ نہیں ہوسکتا۔
