پاکستان شوبز انڈسٹری کی معروف فنکارہ بشریٰ انصاری کا کہنا ہے کہ مریم اورنگزیب اتنی ہٹ ہیں کہ اگر آج ان کی فلم ریلیز ہوئی تو ’سُپر ہٹ‘ ہوگی۔
تفصیلات کے مطابق پاکستان شوبز انڈسٹری کی سینئر اور معروف فنکارہ بشریٰ انصاری کا ویڈیو کلپ سوشل میڈیا پر زیرِ گردش ہے، جس میں انھوں نے سوال کیا کہ اگر سابق وزیرِ اطلاعات مریم اورنگزیب کی فلم ریلیز ہوگئی تو کیا ہوگا؟
حال ہی میں نیشنل آئکون ایوارڈز کی تقریب میں ایوارڈ وصول کرنے کے بعد اداکارہ بشریٰ انصاری نے کہا کہ مریم اورنگزیب تو بہت ہٹ جا رہی ہیں، اگر ان کی آج کوئی فلم ریلیز ہوتی ہے تو اگلی صبح سپر ہٹ ہو جائے گی۔
بشریٰ انصاری کے وائرل ہونے والی ویڈیو پر سوشل میڈیا صارفین نے تبصروں کی لائن لگادی۔
ایوارڈ وصولی کے بعد بشریٰ انصاری نے تقریب میں موجود وزیرِ اعظم شہباز شریف کا بھی شکریہ ادا کیا اور کہا شریف فیملی بھی اندر سے کہیں نہ کہیں آرٹسٹ ہے، میوزک سے آپ لوگوں کو دلچسپی ہے اور یہ جراثیم نہ ہوتے تو شاید آپ لوگ ہماری اس انڈسٹری کے لیے اتنے نرم دل نہ ہوتے۔
