پاکستان نے افغانستان کو دوسرے ون ڈے میچ میں سنسنی خیز مقابلے کے بعد ایک وکٹ سے شکست دیکر تین میچز کی سیریز میں 2-0 کی فیصلہ کن برتری حاصل کرلی۔
ہمبنٹوٹا میں کھیلے گئے دوسرے ون ڈے میچ میں افغانستان کی جانب سے دیا گیا 301 رنز کا ہدف پاکستان نے 49.5 اوورز میں 9 وکٹوں پر حاصل کرلیا، نسیم شاہ نے چوکا لگا کر پاکستان کو کامیابی سے ہمکنار کروایا۔
نسیم شاہ نے 5 گیندوں پر 10 رنز بنا کر پاکستان کو فتح دلوائی، شاداب خان کو 48 رنز کی برق رفتار اننگز کھیلنے پر میچ کا بہترین کھلاڑی قرار دیا گیا۔
Congratulations Team Pakistan 🇵🇰 @76Shadabkhan 💚 pic.twitter.com/6CK8edYG9g
— Iftikhar Ahmad (@IftiMania) August 24, 2023
شاداب خان نے 48 رنز کی برق رفتار اننگز کھیلی، انہیں فاسٹ بولر فضل الحق فاروقی نے ’منکڈ‘ آؤٹ کیا تاہم میچ جیتنے کے بعد نسیم شاہ نے اپنی اننگز شاداب کے نام کی۔
دوسری جانب دوسرا ون ڈے جیتنے کی خوشی میں قومی ٹیم کی جانب سے ایک دوسرے کو مبارکباد دینے کا سلسلہ جاری ہے، اسی طرح قومی کرکٹ ٹیم کے کھلاڑی افتخار احمد نے بھی دلچسیپ پوسٹ شیئر کی ہے۔
آل راؤنڈر افتخار احمد نے سوشل میڈیا ویب سائٹ ایکس پر شاداب خان کی ’منکڈ‘ کی تصویر شیئر کی ہے، ساتھ ہی انہوں نے ٹیم کو مبارک دیتے ہوئے شاداب خان کو ٹیگ کیا ہے۔
