لاہور : آئی جی پنجاب ڈاکٹر عثمان انور نے پی ٹی آئی کارکن علی بلال کی موت کو ٹریفک حادثے کا کیس قرار دے دیا۔
تفصیلات کے مطابق آئی جی پنجاب ڈاکٹر عثمان انور نے نگراں وزیراعلیٰ پنجاب محسن نقوی کے ہمراہ پریس کانفرنس کرتے ہوئے پی ٹی آئی کارکن کی ہلاکت کے حوالے سے بتایا کہ کالےرنگ کی گاڑی سروسزاسپتال آنے کی ویڈیورپورٹ ہوئی، گاڑی پر مقتول کا خون موجود ہے۔جس کا فرانزک کروا لیا گیا ہے۔
آئی جی پنجاب نے بتایا کہ اکتیس کیمروں کی مدد سے گاڑی کو گلبہار سیکورٹی کی بیسمنٹ سے برآمد کیا گیا، 6 بج کر 24 منٹ پر گاڑی ڈیوائیڈر سے ٹکرائی، گاڑی کا مالک راجہ شکیل ہے، جو پی ٹی آئی سنٹرل پنجاب کا نائب صدر ہے۔
ڈاکٹر عثمان انور نے کہا کہ حادثے کی جگہ کی نشاندہی کردی گئی ہے اور گرفتاریاں بھی ہوگئی ہے ، تمام لوگوں کو عدالت میں پیش کیا جائے گا۔
ان کا کہنا تھا کہ کیس میں انصاف ضرور فراہم کیا جائے گا، اگرپولیس نے زیادتی کی ہے تو ان کے خلاف بھی کارروائی ہوگی۔
آئی جی پنجاب نے کہا کہ سوشل میڈیا پر ایک طوفان بدتمیزی جاری ہے، سوشل میڈیا پر پھیلائی جانےوالی ویڈیوجعلی ہیں، یہ سازش ناکام ہوئی، ٹیکنیکل ٹیم کی مدد سے شواہد ملے۔
ڈاکٹر عثمان انور کا کہنا تھا کہ سوشل میڈیا کی ایک ایک ویڈیو کا جواب دیں گے، وعدہ کرتاہوں تمام کیس عوام کے سامنے رکھا جائے گا۔
انھوں نے بتایا کہ پولیس نے فوری علی بلال کے والد کے پیغام پر تحقیقات کا آغاز کیا ہے، ملوث افرادکےخلاف قانونی کارروائی کی جائےگی اور لیاقت علی کو اپنے بیٹے کی موت پرپوری معلومات دی جائیں گی۔
آئی جی پنجاب نے کہا کہ ایسی کوئی ہدایت نہیں کہ بندوں پرتشدد کیاجائے ، پلان بنایا تھا کہ بہت زیادہ لوگوں کو گرفتار نہیں کرنا،ہمارا یہ کام نہیں کہ بہت زیادہ لوگوں کو پکڑیں۔
ظل شاہ کی موت ٹریفک حادثے کا کیس ہے،میڈیکل رپورٹ کے حوالے سےڈاکٹرزسےبات کی، واقعے کے حوالے سے تمام تصاویر شیئرکی جائیں گی اور جو ملزم ہے ان سے بھی ملوایا جائے گا۔
