لاہور: آئی جی پنجاب ڈاکٹر عثمان انور نے فوری طور پر ‘کچے میں آپریشن’ شروع کرنے کا اعلان کردیا ہے۔
تفصیلات کے مطابق انہوں نے یہ اعلان اپنے دورہ خانپور کے دوران کیا ، جہاں انہوں نے گذشتہ روز اغوا ہونے والی ڈاکٹرز فیملی اور بازیاب بچوں سے ملاقات کے بعد کیا۔
آئی جی پنجاب جب ڈاکٹر کے گھر پہنچے تو ننھے سبحان اور کاشان نے انہیں پھولوں کا گلدستہ پیش کیا، اس موقع پر آئی جی پنجاب نے بچوں کو بازیاب کرانے والی پولیس ٹیم کے لئے دس لاکھ روپے انعام کا اعلان کیا۔
میڈیا سے گفتگو کرتے ہوئے آئی جی پنجاب نے کہا کہ آج رات سے ہی کچےمیں آپریشن شروع ہوگا، کچے کےعلاقےمیں پولیس چوکیاں بحال کرناپہلی ترجیح ہے،جو پہلی گاڑی کچےمیں آپریشن کیلئےجائےگی وہ اعلیٰ افسران کی ہوگی۔
انہوں نے بتایا کہ سندھ پولیس بھی پنجاب پولیس کیساتھ آپریشن میں ڈاکوؤں کاصفایاکرےگی۔
یہ بھی پڑھیں: گزشتہ روز اسکول جاتے ہوئے اغوا ہونے والے بچے بہاولپور سے بازیاب
واضح رہے کہ رحیم یار خان کی تحصیل خان پور میں اسکول جاتے ہوئے اغوا ہونے والے دونوں بچوں کو بازیاب کرایا گیا تھا، بچوں کی بازیابی بہاولپور سے عمل میں آئی تھی۔
دونوں بچوں کو گذشتہ روز ڈرائیور کے ساتھ اسکول جانے والے اغوا کیا گیا تھا، بعد ازاں ڈاکٹرز کمیٹی نے انتظامیہ کو چند گھنٹوں کی مہلت دیتے ہوئے کہا تھا کہ بچے بازیاب نہ ہوئے تو تمام سرکاری وغیر سرکاری ہسپتالوں میں کام بند کردیں گے۔
واضح رہے کہ حکومت سندھ نے 10 مارچ کو صوبے کے سرحدی علاقوں میں ڈکیتوں کے خلاف جامع آپریشن شروع کرنے کے لیے پاک فوج اور رینجرز کی مدد کے ساتھ پولیس کو فوجی اسلحہ اور نگرانی کے لیے آلات سے لیس کرنے کے منصوبے کی منظوری دے دی تھی۔
