لاہور کے علاقے ہربنس پورہ میں پولیس کی گاڑی کی ٹکر سے 08 سالہ بچہ جاں بحق ہوگیا۔
تفصیلات کے مطابق لاہور کے علاقے ہربنس پورہ میں پولیس موبائل نے 8 سالہ لڑکے کو کچل دیا، حادثے کی سی سی ٹی وی فوٹیج بھی منظر عام پر آ گئی۔
لڑکے کو ٹکر مارنے والی موبائل ایلیٹ فورس کی تھی جو سی ٹی ڈی ہیڈ کوارٹرز سیکیورٹی پر مامور تھی جبکہ جاں بحق لڑکے کی شناخت ریحان کے نام سے ہوئی۔
سی سی ٹی وی فوٹیج میں دیکھا گیا کہ ریحان گلی میں سائیکل چلا رہا تھاکہ تیز رفتار پولیس موبائل نے اسے کچل دیا، حادثہ کے بعد گلی میں موجود افراد بچے اور پولیس وین کے گرد جمع ہوئے اور ریحان کو اسپتال منتقل کیا گیا لیکن وہ زخموں کی تاب نہ لاتے ہوئے دم توڑ گیا۔
واقعے پر علاقہ مکین نے احتجاج کیا جس کے بعد پولیس افسران بھی موقع پر پہنچ گئے، لواحقین کے احتجاج کے بعد پولیس نے مقدمہ درج کر کے گاڑی کے ڈرائیور کو گرفتار کرلیا۔
