لاہور: سرحدوں پر موجودہ صورتحال کے پیش نظر آئی جی پنجاب ڈاکٹر عثمان انور نے لاہور سمیت صوبہ بھر میں سکیورٹی بڑھانے کا حکم دے دیا۔
اے پی پی کی رپورٹ کے مطابق آئی جی پنجاب نے جمعرات کو جاری بیان میں کہا کہ پنجاب پولیس موجودہ ملکی صورتحال کے پیش نظر ہائی الرٹ ہے، پنجاب پولیس کی آپریشنل، سٹریٹجک اور لاجسٹکس تیاریاں مکمل ہیں۔
یہ بھی پڑھیں: پاک بھارت کشیدگی، اسلام آباد ایئرپورٹ بند
ڈاکٹر عثمان انور کا کہنا ہے کہ ضلعی انتظامیہ، سول ڈیفنس، ریسکیو 1122 اور سکیورٹی اداروں سے مکمل کوارڈینیشن میں ہیں، کسی بھی ہنگامی صورتحال میں پنجاب پولیس سکیورٹی، لا اینڈ آرڈر، امدادی سرگرمیاں یقینی بنائے گی۔
انہوں نے کہا کہ بین الصوبائی سرحدی پولیس چوکیوں سمیت تمام اہم اور حساس مقامات کی سکیورٹی بڑھا دی گئی ہے، ملکی اندرونی سرحدوں کے تحفظ کیلیے دہشتگردوں اور شر پسند عناصر پر کڑی نظر رکھیں۔
آئی جی پنجاب نے کہا کہ پنجاب پولیس اپنی افواج کے شانہ بشانہ اور دشمن کے سامنے سیسہ پلائی دیوار ہے، اس موقع پر آئی جی نے آر پی اوز، ڈی پی اوز سمیت تمام فارمیشنز سربراہان کو وار بک کے مطابق ہدایات جاری کیں۔
گزشتہ روز آئی جی سندھ غلام نبی میمن نے بھی پولیس کو الرٹ رہنے کی ہدایت کرتے ہوئے کہا تھا کہ شرپسند عناصر پر کڑی نظر رکھی جائے۔
آئی جی غلام نبی میمن نے ہدایت کی تھی کہ ملکی صورتحال کے تناظر میں سکیورٹی ہائی الرٹ ہے، اہم اور حساس مقامات کی سکیورٹی بڑھائی جائے۔
