The news is by your side.

Advertisement

سندھ پولیس کے جوان اور افسران اب نئے یونیفارم میں نظر آئیں گے

کراچی : سندھ حکومت نےآئی جی سندھ ڈاکٹر سید کلیم امام کی پولیس یونیفارم کی تبدیلی کی تجویز کی باقاعدہ منظوری دے دی، ابتدائی مرحلے میں سندھ کے پانچ یونٹس کے یونیفارم تبدیل کئے جائیں گے۔

تفصیلات کے مطابقسندھ حکومت نے سندھ پولیس یونیفارم کی تبدیلی کی منظوری دیدی یونیفارم کی تبدیلی کی آئی جی سندھ کلیم امام نے تجویز دی تھی۔

آئی جی سندھ کلیم امام کا کہناہے کہ پولیس یونیفارم کو رنگ سمیت مجموعی طور پر تبدیل کرنے کا مقصد بین الاقوامی معیار سے ہم آہنگ کرنا ہے، یونیفارم تبدیلی سے پولیس کا اچھا اور مثبت تاثر بھی عام ہوگا، مجھے قوی امید ہے کہ عوام اس تبدیلی کو نا صرف دل و جان سے قبول کریں گے بلکہ سراہیں گے بھی۔

یونیفارم تبدیلی کے حوالے سے ڈی آئی جی آپریشن سندھ مقصود میمن نے بریفنگ میں کہا پائلٹ پراجیکٹ کے تحت سندھ پولیس میں یونیفارمز کی تبدیلی کے عمل اورجملہ امورکو شفاف وغیرجانبداربنایا جارہا ہے، مجوزہ پولیس یونیفارم کی فراہمی کے لیے صرف سندھ پولیس ہی مجاز ہوگی۔

مقصود میمن نے کہا کسی بھی خاص یا عام اسٹور کو یونیفارم کو فروخت کرنے یا ڈسپلے کرنے کی ہرگز اجازت نہیں ہوگی ، سن دو ہزار بیس اور اکیس سے ہر افسر اور جوان کو چار چار یونیفارم دینے کی سفارش کی جائے گی۔

ابتدائی مرحلے میں سندھ کے پانچ یونٹس کے یونیفارم تبدیل کئے جائیں گے، جن میں ٹریفک پولیس سی آئی اے اینٹی رائٹس ریزرو پلاٹون ، فارنزک ڈوژن سندھ اور سی پی او میں تعینات جوانوں اور افسران شامل ہوں گے۔

ٹریفک افسران کی شرٹ کا رنگ سفید شرٹ نیوی بلو پینٹ اور نیوی بلو پی کیپ جبکہ ٹریفک اہلکاروں کی یونیفارم کا رنگ ہاف سلیپ وائٹ ٹی شرٹ نیوی بلو پینٹ اور نیوی بلو پی کیپ ہوگا۔

سی پی او اور دیگر تمام یونٹ کے افسران کا یونیفارم ڈارک بلو شرٹ نیوی بلو بینٹ اور نیوی بلو پی کیپ جبکہ ہیڈ کانسٹبل اور کانسٹبل کے یونیفارم میں ڈارک بلو ہاف سلیپ شرٹ نیوی بلو پینٹ اور نیوی بلو پی کیپ پر مشتمل ہوگا اور بیلٹ کی چوڑائی کو پہلے ڈھائی انچ تھی، جسے دو انچ کیا جارہا ہے۔

Comments

comments

یہ بھی پڑھیں