اسلام آباد ہائیکورٹ نے پاکستان نرسنگ اینڈ مڈوائفری کونسل (پی این ایم سی) کی صدر فرزانہ ذوالفقار کی تعیناتی کا نوٹیفکیشن کالعدم قرار دیتے ہوئے جواد امین خان کو کے عہدے پر بحال کرنے کا حکم دے دیا۔
اسلام آباد ہائیکورٹ کے جسٹس طارق محمود جہانگیری نے 30 صفحات پر مشتمل تفصیلی فیصلہ جاری کر دیا جس میں شاہد حسین کو بھی پی این ایم سی کے نائب صدر کے عہدے پر بحال کرنے کا حکم دیا گیا۔
واضح رہے کہ کونسل کے صدر جواد امین خان کو نگران دور حکومت میں عہدے سے ہٹایا گیا تھا، تاہم جسٹس طارق محمود جہانگیری نے تحریری فیصلے میں کہا کہ نگران حکومت کے اختیارات کے حوالے سے سپریم کورٹ کا فیصلہ موجود ہے، الیکشن ایکٹ 2017 میں بھی نگران حکومت کے کام کی وضاحت کی گئی ہے۔
یہ بھی پڑھیں: پاکستان نرسنگ کونسل کے نام سے جعلی ادارہ چلانے والا گروہ گرفتار
تحریری فیصلے کے مطابق پٹیشنرز کو وزیر اعظم اور وفاقی کابینہ کی منظوری سے تعینات کیا گیا تھا، کابینہ کی منظوری کے بغیر پٹیشنرز کو ڈی نوٹیفائی کرنا سپریم کورٹ کے فیصلے کی خلاف ورزی ہے، ڈی نوٹیفائی کرنے سے قبل درخواست گزاروں کو کوئی شوکاز نوٹس نہیں دیا گیا۔
اس میں لکھا گیا کہ پٹیشنرز کو ڈی نوٹیفائی کرنے سے قبل ان کے خلاف کوئی انکوائری بھی نہیں کی گئی، ایسی کوئی دستاویز بھی ریکارڈ پر نہیں جس کی بنیاد پر پٹیشنرز کو عہدوں سے ہٹایا گیا ہو، ایک ہفتے میں جواد امین خان کو صدر جبکہ شاہد حسین کو نائب صدر کے عہدوں پر بحال کیا جائے، فریقین فیصلے پر عملدرآمد کر کے رپورٹ ایڈیشنل رجسٹرار جوڈیشل کے پاس جمع کروائیں۔
