لاہور : گردوں کی غیر قانونی پیوند کاری کا مکروہ دھندہ کرنے والا گروہ پکڑا گیا، لاہور پولیس نے 3ڈاکٹروں سمیت 11 ملزمان کو حراست میں لے لیا۔
اس حوالے سے ڈی ایس پی سول لائن راشد امین بٹ نے صحافیوں کو بتایا کہ سی آئی اے سول لائن پولیس نے کامیاب کارروائی کرتے ہوئے متعدد ملزمان کو گرفتار کیا جن میں 3 ڈاکٹرز بھی شامل ہیں۔
انہوں نے کہا کہ گرفتار ملزمان میں محمد آصف، شاہد عباسی، طارق نذیر، اسامہ علی، عمر جرار، محمد امتیاز، ریاض احمد اور ارسلان شامل ہیں۔
ڈی ایس پی سول لائن کا کہنا تھا کہ اس گروہ میں شامل تین ڈاکٹرز، جن کی شناخت ڈاکٹر ثاقب خان، ڈاکٹر طارق محمود اور ڈاکٹر ارشد کے ناموں سے کی گئی ہے کو بھی گرفتار کیا گیا ہے۔
انہوں نے بتایا کہ اس گروہ کا سربراہ ڈاکٹر ثاقب خان ہے اور وہ ماضی میں بھی گردوں کی غیر قانونی خرید و فروخت میں ملوث رہا ہے۔
راشد امین بٹ نے مزید بتایا کہ ملزمان نے3 مختلف افراد اظہر، سانول اور صبا کےگردے بھی نکالے، پولیس کے چھاپے سے قبل بھی ملزمان نے 2غیرملکی افراد کے گردے ٹرانسپلانٹ کیے تھے۔
انہوں نے کہا کہ دوران کارروائی سی آئی اے پولیس نے وقوعہ سے انسانی اعضاء کی تبدیلی کیلیئے استعمال ہونے والے آلات، ممنوعہ ادویات اور چار گاڑیاں بھی برآمد کی ہیں، ملزمان کے دیگر ساتھیوں کی گرفتاری کے لیے صوبے بھر میں چھاپے مارے جا رہے ہیں۔
