کراچی : دودھ کو سرکاری قیمت سے زائد فروخت کرنے والوں کے خلاف کمشنر کراچی کی ہدایت پر ضلعی انتظامیہ حرکت میں آگئی، منافع خوروں کے خلاف کریک ڈاؤن شروع ہوگیا۔
اس حوالے سے کراچی کے علاقے میں اسسٹنٹ کمشنر نے بھیس بدل کر ایک ملک شاپ میں مہنگا دودھ بیچنے پر دکاندار کو رنگے ہاتھوں گرفتار کرلیا۔
اسسٹنٹ کمشنر گارڈن رانا محمد ابو بکر نے عام شہری بن کر مہنگے دودھ فروشوں کے خلاف کریک ڈاؤن کیا انہوں نے بھیس بدل کر مہنگا دودھ فروخت کرنے والوں کی دکانوں پر چھاپے مارے۔
اسسٹنٹ کمشنر گارڈن رانا محمد ابوبکر نے اے آر وائی نیوز کو بتایا کہ گارڈن کے علاقے میں جیلانی ملک شاپ پر چھاپہ مار کر موقع پر ہی دکاندار کو گرفتار کرکے جیل بجھوا دیا ہے۔
اسسٹنٹ کمشنر کا کہنا ہے کہ کسی کو تازہ دودھ زائد قیمت پر فروخت کرنے کی اجازت نہیں دی جائے گی، عوام کی جیبوں پر ڈاکہ ڈالنے والوں کو نہیں بخشیں گے۔
ڈپٹی کمشنر ساؤتھ کیپٹن ریٹائرڈ محمد سعید لغاری کا کہنا تھا کہ مہنگا دودھ بیچنے والوں کے خلاف سخت سے سخت کاروائی کی جائے گی۔ انہوں نے کہا کہ کمشنر کراچی کے واضح احکامات کے بعد ناجائز منافع خوروں کے خلاف کریک ڈاؤن کی کارروائیوں میں مزید اضافہ کیا جائے گا۔
واضح رہے کہ دودھ کی سرکاری قیمتوں کے تعین کے لیے ڈیری مالکان اور کراچی انتظامیہ میں کئی روز سے ڈیڈ لاک برقرار تھا، گزشتہ روز فریقین نے170 روپے فی لیٹر نئی قیمت کے تعین پر اتفاق کیا تھا۔
مزید پڑھیں : دودھ کی قیمتوں میں 50 روپے فی لیٹر کا بڑا اضافہ
دوسری جانب سرکاری نرخ مقرر ہونے کے باوجود کراچی میں دودھ اس سے کہیں زیادہ 200 روپے فی لیٹر پر گزشتہ کئی روز سے کھلے عام فروخت کیا جا رہا ہے۔
اس سے قبل کراچی انتظامیہ نے مہنگا دودھ فروخت کرنے والوں کے خلاف بڑی کارروائی کرتے ہوئے شہر میں دودھ سپلائی کرنے والی درجنوں گاڑیوں کو ضبط کرکے تھانوں میں کھڑا کردیا تھا۔
