کراچی : سندھ حکومت نے ناجائز منافع خوروں کو پکڑ کر اسی وقت سخت سزا دینے کا فیصلہ کرلیا ہے، مرتضیٰ وہاب کا کہنا ہے کہ مہنگی اشیائے خوردو نوش بیچنے والوں کا مال ضبط کر کے فوری طور پر نیلام کردیا جائے گا۔
کراچی میں پریس کانفرنس سے خطاب کرتے ہوئے ترجمان سندھ حکومت نے بتایا کہ مہنگائی اور ناجائز منافع خوری کے سدباب کیلئے اہم فیصلے کیے گئے ہیں، جس کے تحت جو دکاندار یا ریڑھی والا سرکاری پرائس لسٹ کے زیادہ قیمت وصول کرے گا اس کیخلاف فوری کارروائی ہوگی۔
انہوں نے بتایا کہ اس کیلئے قانون سازی بھی کرلی گئی ہے، جس کے تحت خلاف ورزی کرنے والے دکاندار کا مال ضبط کرکے اسے سرکاری قیمت پر نیلام کردیا جائے گا اور مزید یہ کہ اس پر ہزاروں کی نہیں لاکھوں مالیت کا جرمانہ عائد کیا جائے گا۔
انہوں نے بتایا کہ صوبائی کابینہ اور گورنر سندھ کی منظوری کے بعد یہ قانون 23مارچ 2023سے نافذ العمل ہوچکا ہے، جس پر اب سختی سے عمل درآمد کیا جائے گا۔
اس حوالے سے ایک سوال پر انہوں نے بتایا کہ دکاندار اور ریڑھی والے اشیاء کی قیمتوں میں ازخود اضافہ کرتے ہیں، گزشتہ روز میں نے بھیس بدل کر ایک ریڑھی والے سے کیلے کا ریٹ پوچھا تو اس نے 200 روپے درجن بتایا۔ پہلے تو اس نے مجھے نہیں پہچانا لیکن جیسے ہی اس نے میرے پیچھے کھڑے شخص کو دیکھا تو فوراً ہی اصل قیمت بتا دی لیکن میں نے اسی وقت متعلقہ افسر کو بلا کر سارا مال ضبط کروایا اور نیلام کرادیا۔
پریس کانفرنس سے خطاب کرتے ہوئے مرتضیٰ وہاب نے کہا کہ کراچی سمیت صوبے سندھ میں بلدیاتی انتخابات کے بعد منتخب عہدیداران تاحال حلف نہیں اٹھا سکے ہیں۔ میئر و ڈپٹی مئیر، ٹاؤنز کے چیئرمین و وائس چیئرمین کے انتخابات سے متعلق الیکشن کمیشن کو خط لکھ کر تفصیلات سے آگاہ کردیا ہے۔
ان کا کہنا تھا کہ بلدیاتی انتخابات کا پہلا فیزجون اور دوسراجنوری میں ہوا، لیکن کامیاب بلدیاتی نمائندے ابھی تک حلف نہیں لے سکے ہیں۔
