اسلام آباد: آئی ایم ایف نے کے الیکٹرک سے 662 ارب روپے کے واجبات وصولی کی شرط لگا دی۔
تفصیلات کے مطابق سرکلر ڈیٹ کے خاتمے کے لیے آئی ایم ایف کی نئی شرط سامنے آئی ہے، انٹرنیشنل مانیٹرنگ فنڈ نے کے الیکٹرک سے 662 ارب روپے کے واجبات وصولی کی شرط عائد کر دی۔
آئی ایم ایف نے شرط رکھی ہے کہ حکومت رواں مالی سال میں کے الیکٹرک سے واجبات وصول کرے، وزارت خزانہ اور پاور ڈویژن کو 30 جون 2023 تک اس شرط پر عمل درآمد کرانا ہوگا۔
دستاویز میں کہا گیا ہے کہ کے الیکٹرک نے 2018 سے قومی گرڈ سے بجلی خریداری کی رقم ادا نہیں کی، کے الیکٹرک کو قومی گرڈ سے بجلی فراہمی کا معاہدہ 2015 میں ختم ہو گیا تھا۔
آئی ایم ایف کی شرط ، گیس کی قیمتوں میں اضافے کا امکان
آئی ایم ایف نے کے الیکٹرک کو بغیر معاہدہ اور ادائیگی کے بجلی فراہمی پر تحفظات کا اظہار کیا ہے، جون 2022 تک کے الیکٹرک کے 490 ارب روپے کے واجبات ہیں، رواں مالی سال کے الیکٹرک کے بجلی واجبات میں 172 ارب روپے کا اضافہ ہوگا۔
دستاویز کے مطابق وفاق کو کے الیکٹرک کے ساتھ 30 جون 2023 تک نیا بجلی فروخت کا معاہدہ کرنا ہوگا۔
