لاہور : کورونا وائرس لاک ڈاؤن کے باعث بند کیے جانے والے امیگریشن اور پاسپورٹ کے دفاتر آج سے کھول دیئے گئے ہیں، دفاتر کے اوقات کار صبح دس بجے سے دوپہر ایک بجے ہوں گے۔
تفصیلات کے مطابق ملک بھر میں کورونا وئرس کے بچاؤ کے پیش نظر لگائے جانے والے لاک ڈاؤن میں جہاں دیگر شعبہ جات اور اداروں کی بندش ہوئی وہیں امیگریشن اور پاسپورٹ دفاتر بھی بند کردیئے گئے تھے تاہم امیگریشن اور پاسپورٹ کے دفاتر آج تقریباً81روز بعد کھولے جارہے ہیں۔
اس حوالے سے وزارت داخلہ نے نوٹیفکیشن بھی جاری کردیا ہے، اس سلسلے میں وزارت داخلہ نے تمام پاسپورٹ دفاتر کو مراسلہ جاری کیا ہے، مراسلہ میں کہا گیا ہے کہ تمام پاسپورٹ دفاتر صبح10سے دوپہر ایک بجے تک کھلے رہیں گے۔
دفاترمیں50سال سے زائد عمرکے افراد کا داخلہ ممنوع ہوگا، پاسپورٹ صرف ارجنٹ فیس کے ساتھ جمع کرائے جاسکتے ہیں، حکومت کی جانب سے جاری ایس اوپیز پرعملدرآمد لازمی قرار دیا گیا ہے، پاسپورٹ دفاتر کورونا کے باعث21مارچ کو بند کیے گئے تھے۔
مزید پڑھیں : زائد المعیاد پاکستانی پاسپورٹ رکھنے والوں کے لیے اہم خبر
یاد رہے کہ وزارت داخلہ نے کرونا لاک ڈاؤن کے پیش نظر زائد المعیاد ہونے والے پاسپورٹ اور شناختی کارڈز کی مدت میں مزید تیس جون 2020 تک توسیع کردی تھی۔
وزارتِ داخلہ کے نوٹیفکیشن میں بتایا گیا تھا کہ کرونا وائرس کا پھیلاؤ روکنے کے لیے نئے شناختی کارڈ اور پاسپورٹ جاری نہیں کیے جارہے۔
