عمران خان کی سابقہ اہلیہ جمائمہ نے کہا ہے کہ ان کے بیٹوں قاسم اور سلیمان کے ٹوئٹر پر اکاؤنٹس جعلی ہیں جو پاکستان میں سیاسی ایجنڈے کے لیے جعلسازوں نے بنائے ہیں۔
سابق وزیراعظم عمران خان کی گرفتاری کے بعد ملک میں پیدا ہونے والی بدامنی کی صورتحال کے بعد اب یہ نیا انکشاف سامنے آیا ہے کہ عمران خان کے بیٹوں قاسم اور سلیمان کے ٹوئٹر پر جعلی اکاؤنٹس ہیں جو جعلسازوں نے پاکستان میں سیاسی ایجنڈے کے لیے بنائے ہیں۔
اس حوالے سے عمران خان کی سابقہ اہلیہ جمائمہ گولڈ اسمتھ نے ایک ٹویٹ کیا ہے جس میں اپنے بیٹوں کے ٹوئٹر اکاؤنٹس سے متعلق وضاحت کرتے ہوئے بتایا ہے کہ ان کے بیٹوں سے منسوب اکاؤنٹس جعلی ہیں اور یہ اکاؤنٹس پاکستان میں سیاسی ایجنڈے کے لیے جعل سازوں نے بنائے ہیں۔
جمائما سے ایک ٹوئٹر صارف نے اُن کے بیٹوں سلیمان خان اور قاسم خان کے اکاؤنٹس کی تصویر شیئر کرتے ہوئے پوچھا تھا کہ ’کیا یہ آپ کے بچوں کے اصل اکاؤنٹس ہیں؟‘
جمائما گولڈسمتھ کے بیٹوں سے منسوب اکاؤنٹس میں ڈسپلے پکچر پر دونوں کی عمران خان کے ساتھ تصاویر اور اُن کی حمایت میں ٹویٹس موجود ہیں۔ سلیمان خان کے بائیو میں لکھا ہے کہ ’لڑو! جب تک تم کامیاب ہو جاؤ۔‘
جمائما گولڈسمتھ نے اسی ٹویٹ کو ری ٹویٹ کرتے ہوئے لکھا کہ ’شکریہ ایلون مسک۔ خود کو میرے بچے ظاہر کرنے والے جعلی اکاؤنٹس جو پاکستان میں سیاسی ایجنڈے کے لیے جعل سازوں نے بنائے ہیں۔ جب آپ نے بلیو ٹک ہٹائے تھے تو مجھے جو ڈر تھا کہ ایسا ہوگا اور وہی ہوا۔ آپ کی اطلاع کے لیے عرض ہے کہ میرے بچے سوشل میڈیا پر نہیں ہیں اور نہ ہی ان کا کوئی ارادہ ہے۔‘
Thanks @elonmusk
Fake accounts pretending to be my children, created by imposters with a political agenda in Pakistan. This is exactly what I feared would happen when you took away Twitter’s verification blue ticks. FYI my children are not on social media & have no plans to be. https://t.co/60p8lTSwoU— Jemima Goldsmith (@Jemima_Khan) May 18, 2023
واضح رہے کہ عمران خان اور جمائما کی شادی ختم ہوئے 19 سال ہوچکے ہیں تاہم عمران خان کے سیاسی مخالفین اس حوالے سے گفتگو کرتے رہتے ہیں اور ان پر تنقید کی جاتی ہے۔ کچھ عرصہ قبل پاکستان مسلم لیگ ن کی نائب صدر مریم نواز شریف اور جمائما گولڈ سمتھ کے درمیان ٹوئٹر پر نوک جھونک بھی ہوئی تھی۔
