کراچی: ماہر تعلیم خالد رضا کے قتل کی تحقیقات کے دوران انکشافات سامنے آگئے، خالد رضا کو 3 ماہ قبل گھر پر ایک گھڑی کا پارسل موصول ہوا،جس میں 8 بجکر 10 منٹ کا وقت لکھا تھا، ان کو قتل بھی اسی وقت کیا گیا۔
تفصیلات کے مطابق کراچی کے علاقے گلستان جوہر میں ماہر تعلیم خالد رضا کے قتل کی تحقیقات جاری ہے، ماہر تعلیم خالد رضا کے قتل کی تفتیش میں اہم انکشافات سامنے آگئے۔
پولیس ذرائع نے بتایا کہ خالد رضا کی ریکی 3 ماہ قبل شروع کی گئی، ان کو 3 ماہ قبل گھر پر ایک پارسل موصول ہوا، رائیڈر نے پارسل خالد رضا کے گھر کی تصدیق کے بعد اہل خانہ کے حوالے کیا۔
ذرائع کا کہنا تھا کہ پارسل میں سے گھڑی نکلی، جس میں وقت 8 بجکر 10 منٹ تھا جبکہ اہل خانہ نے پارسل پہنچانے والے رائیڈر کو گھر کی ویڈیو بناتے ہوئے دیکھا اور اہل خانہ کے روکنے پر رائیڈر بھاگ نکلا۔
پولیس نے کہا کہ گھڑی کے ساتھ ملنے والی پرچی پر "گڈ لک خالد رضا” درج تھا تاہم پرچی جس نے بھیجی اس حوالے سے تحقیقات کررہے ہیں۔
یاد رہے خالد رضا کو چند روز قبل رات 8 بجکر 10 منٹ پر ہی قتل کیا گیا تھا۔
