اسلام آباد : وزیراعظم آفس نے وزارت خارجہ کو شنگھائی تعاون تنظیم اجلاس کے دوران چند اہم شخصیات سے وزیراعظم شہباز شریف کی ملاقاتوں کا ٹاسک دے دیا۔
تفصیلات کے مطابق شنگھائی تعاون تنظیم کےسربراہی اجلاس کےحوالے سے وزارت خارجہ کو اہم ٹاسک دے دیا گیا ہے۔
ذرائع نے بتایا کہ وزیراعظم افس کی جانب سے دفترخارجہ کو کہا گیا ہے کہ پندرہ اور سولہ ستمبر کو ثمرقند میں شنگھائی تعاون تنظیم کے سربراہی اجلاس کے دوران تین بڑے ممالک کی اہم شخصیات سے وزیراعظم شہبازشریف کی الگ سے ملاقاتوں کا اہتمام کیا جائے۔
اس سلسلے میں وزات خارجہ کی اعلی شخصیات نے ان ملاقاتوں کے لیے کوششیں شروع کردی ہیں۔
وزیراعظم افس کی جانب سے یہ بھی بتایا گیا ہے کہ وزیراعظم شہبازشریف اس اہم اجلاس میں شرکت کریں گے۔
دفترخارجہ کے ذرائع کے مطابق اب تک ان تین ممالک کی سربراہاں میں سے کسی سے بھی ملاقات طے نہیں ہوئی ہے تاہم اس کے لیے کوششیں جاری ہے۔
خیال رہے وزیراعظم شہباز شریف 15 سے 16 ستمبر تک ازبکستان کا دورہ کریں گے، جہاں وہ سمرقند میں شنگھائی تعاون تنظیم کے اجلاس سے خطاب کریں گے۔
ذرائع نے بتایا ہے کہ وزیراعظم شنگھائی تعاون تنظیم کے اجلاس میں شرکت کے بعد 16 ستمبر کی شام کو وطن واپس لوٹیں گے۔
