اسلام آباد: وزیراعظم کے معاون خصوصی عطا تارڑ نے واضح کیا ہے کہ عمران خان کی گرفتاری پر مظاہرے اور قانون کی خلاف ورزی کرنےوالوں کیخلاف کارروائی ہوگی۔
تفصیلات کے مطابق اسلام آباد میں نیوز کانفرنس کرتے ہوئے عطا تارڑ نے کہا کہ القادرٹرسٹ ملکی تاریخ میں کرپشن کاسب سےبڑااسکینڈل ہے 190ملین پاؤنڈ کےکیس میں کوئی بھی پیش ہونے کو تیارنہیں تھا۔
عطاتارڑ نے کہا کہ عمران خان اور ان کی اہلیہ القادر ٹرسٹ کےٹرسٹی ہیں، عمران خان جعلی ٹرسٹ بناکراربوں روپے اپنے استعمال میں لائے عمران خان نے کابینہ کے ذریعے پراپرٹی تائیکون کےاربوں روپے معاف کیے مگر آج عمران خان کی اپنی کرپشن عوام کے سامنے آچکی۔
وزیراعظم کے معاون خصوصی نے الزام عائد کیا کہ عمران خان نے چار سال ملک و قوم کے پیسے کو بےدردی سےلوٹا،عمران خان نےبطور وزیراعظم اپنےاختیارات کا ناجائز استعمال کیا،چند لوگوں کی مدد سےعمران خان نےملک کوتباہی کےدہانےپرلاکھڑاکیا القادرٹرسٹ کاسارا معاملہ شہزاداکبر نےطےکیااورآج وہ ملک سےفرارہے۔
یہ بھی پڑھیں: عمران خان کو گرفتار کر لیا گیا
انہوں نے کہا کہ عمران خان نے ن لیگ کی قیادت کیخلاف کرپشن کےبےبنیاد الزامات لگائے،اس نے اپنےدوراقتدار میں سیاسی مخالفین کوجھوٹےمقدمات میں جیلوں میں ڈالا اب عمران خان کو اپنی کرپشن کاحساب دینا ہوگا۔
عطاتارڑ نے واضح کیا کہ نیب ایک آزاد ادارہ ہے، کیس کی تحقیقات میرٹ پرہوں گی،کوئی لاڈلہ نہیں، قانون کےسامنےسب برابرہیں
واضح رہے کہ چیئرمین پی ٹی آئی مختلف کیسز میں درخواست ضمانت دائر کرنے کے لئے اسلام آباد ہائی کورٹ پہنچے تھے جہاں رینجرز نے انہیں القادر ٹرسٹ کیس میں گرفتار کیا، ان کی گرفتاری عدالتی احاطے سے عمل میں لائی گئی۔
