اسلام آباد: عدالت کی جانب سے رہائی کے احکامات کے فوراً بعد سائفر کیس میں چیئرمین پی ٹی آئی کی گرفتاری ڈال دی گئی۔
تفصیلات کے مطابق اسلام آباد ہائی کورٹ نے توشہ خانہ کیس میں چیئرمین پی ٹی آئی کی سزا معطل کرتے ہوئے انھیں رہا کرنے کا حکم دے دیا ہے، تاہم سائفر کیس میں ان کی گرفتاری ڈال دی گئی ہے۔
عدالت کی جانب سے ملزم کا جوڈیشل ریمانڈ بھی لے لیا گیا ہے، عدالت کی جانب سے تحریری آرڈر سپرنٹنڈنٹ اٹک جیل کو بھجوا دیے گئے، واضح رہے کہ چیئرمین پی ٹی آئی کا سائفر کیس میں جوڈیشل ریمانڈ کل ختم ہو رہا ہے۔
کل ایف آئی اے کی جانب سے عدالت میں جسمانی ریمانڈ کی استدعا بھی کی جائے گی، ایف آئی اے ٹیم چیئرمین پی ٹی آئی کو سائفر کیس میں حراست میں لے گی اور کل ہی خصوصی عدالت میں پیش کرے گی۔
توشہ خانہ کیس میں چیئرمین پی ٹی آئی کی سزا معطل ، رہا کرنے کا حکم
واضح رہے کہ اسلام آباد ہائی کورٹ نے توشہ خانہ کیس میں چیئرمین پی ٹی آئی کی سزا معطل کرتے ہوئے انھیں رہا کرنے کا حکم دے دیا۔ گزشتہ روز اسلام آباد ہائی کورٹ کے چیف جسٹس عامر فاروق اور جسٹس طارق جہانگیری نے توشہ خانہ کیس میں سابق وزیر اعظم کی سزا معطلی کی درخواست کی سماعت میں دلائل مکمل ہونے پر فیصلہ محفوظ کیا تھا۔
