پنجاب میں نگراں وزیراعلیٰ کے تقرر کے لیے اپوزیشن لیڈر حمزہ شہباز کو آج ہی خط لکھا جائے گا جس میں ان سے نام مانگے جائیں گے۔
اے آر وائی نیوز کو ذرائع نے بتایا ہے کہ پنجاب اسمبلی تحلیل اور نگراں وزیراعلیٰ کے تقرر کیلیے پی ٹی آئی چیئرمین عمران خان نے پارٹی سینیئر قیادت کا مشاورتی اجلاس طلب کرلیا ہے جس میں پنجاب اسمبلی میں اپوزیشن لیڈر حمزہ شہباز کو نگراں وزیراعلیٰ کے ناموں کے لیے خط لکھنے کی منظوری دی جائے گی۔
ذرائع کے مطابق اجلاس میں نگراں وزیراعلیٰ پنجاب کے لیے اچھی شہرت کے حامل بیورو کریٹ، سابقہ ججز اور سماجی شخصیت کے ناموں پر غور ہوگا اور پی ٹی آئی رہنما اس عہدے کے لیے نام پارٹی چیئرمین عمران خان کو دیں گے۔ عمران خان ق لیگ سے باہمی مشاورت کے بعد 3 ناموں کی منظوری دیں گے۔
ذرائع کا کہنا ہے کہ نگران وزیراعلی کے ناموں کے لیے آج ہی حمزہ شہباز کو خط لکھا جائے گا۔ 3 نام اپوزیشن لیڈر دے گا اور 3 نام حکومتی اتحاد کی جانب سے دیے جائیں گے۔
واضح رہے کہ وزیراعلیٰ پنجاب چوہدری پرویز الہٰی نے گزشتہ روز گورنر بلیغ الرحمٰن کو پنجاب اسمبلی کی تحلیل کی سمری بھجوا دی تھی۔
آج صبح گورنر پنجاب سے اسمبلی تحلیل کی سمری ملنے کی تصدیق کردی تھی۔ آئین کے مطابق گورنر اگر نے سمری پر دستخط نہ کیے تو 48 گھنٹوں بعد اسمبلی ازخود تحلیل ہوجائے گی۔
