اسلام آباد: حکومت اور پی ٹی ائی وفد کے درمیان مذاکرات کا پہلا دور ختم ہوگیا۔
اے آر وائی نیوز کے مطابق ذرائع کا بتانا ہے کہ مذاکرات میں پی ٹی آئی نے قومی اسمبلی تحلیل کرنے کی تاریخ دینے پر زور دیا ہے، جولائی کے بعد اسمبلی کی تحلیل پی ٹی آئی کو قبول نہیں ہوگی۔
ذرائع کا کہنا ہے کہ چیئرمین پی ٹی آئی عمران خان جولائی تک قومی اسمبلی کی تحلیل چاہتے ہیں۔
دوسری جانب شاہ محمود قریشی کا کہنا ہے کہ ہم مذاکرات کے ذریعے حل نکالنا چاہتے ہیں، سیاسی مسائل کا حل گفت و شنید سے نکل سکتا ہے اگر نیت صاف ہو۔
انہوں نے کہا کہ ہم چاہتے ہیں کوئی بھی حل نکلے آئین کے مطابق ہو اس سے ماورا نہیں، مذاکرات کو تاخیری حربے کے طور پر استعمال نہیں کرنا چاہتے۔
اسلام آباد: حکومتی اور پی ٹی آئی وفد کے درمیان مذاکرات ختم#ARYNews pic.twitter.com/eCfWWKL6ZS
— ARY NEWS (@ARYNEWSOFFICIAL) April 27, 2023
شاہ محمود قریشی نے کہا کہ ہم ملکی مفاد اور عوام کی فلاح کو مدنظر رکھ کر آگے بڑھنا چاہتے ہیں، ہم نے اپنا اور انہوں نے اپنا نقطہ نظر پیش کردیا ہے۔
پی ٹی آئی رہنما نے بتایا کہ طے ہوا ہے کہ کل ہماری دوسری نشست اسی کمیٹی روم نمبر تین میں تین بجے ہوگی۔
شاہ محمود قریشی کا کہنا ہے کہ عمران خان نے ہمیں مکمل مینڈیٹ دیا ہے، اتحادی حکومت نے کہا انہیں اتحادی جماعتوں کو آن بورڈ لینا ہے، ہم نے کہا کھلے ذہن کے ساتھ پروپوزل لائیں جس پر مزید بات ہوگی۔
