محسن شاہ نواز رانجھا کی مدعیت میں اقدام قتل سے متعلق کیس میں اسلام آباد ہائی کورٹ نے چیئرمین پی ٹی آئی عمران خان کی حاضری سے استثنیٰ کی درخواست منظور کرتے ہوئے ضمانت میں مزید توسیع کر دی۔
اسلام آباد ہائی کورٹ کے چیف جسٹس عامر فاروق نے کیس کی سماعت کی۔ اس موقع پر عمران خان کی جانب سے فیصل چوہدری ایڈووکیٹ عدالت پیش ہوئے۔
وکیل عمران خان نے عدالت میں کہا کہ درخواست گزار پیش ہونا چاہتے ہیں مگر لاہور ہائی کورٹ میں پیش ہونا تھا۔
اس پراسٹیٹ کونسل زوہیب گوندل نے کہا کہ درخواست گزار ابھی تک شامل تفتیش نہیں ہوئے، دو نوٹسز ہم نے جاری کر دیے مگر وہ ابھی تک پیش نہیں ہوئے۔
فیصل چوہدری نے کہا کہ تفتیشی افسر سمجھتے ہیں کہ فزیکل بیان ریکارڈ کرانا ضروری ہے، تفتیشی افسر ساتھ چلیں میں خود ان کا بیان لاہور میں ریکارڈ کراتا ہوں، جس دن عمران خان نے یہاں آنا ہے اسی دن بیان ریکارڈ کیا جائے۔
اس پر چیف جسٹس عامر فاروق نے ریماکس دیے کہ تفتیشی اور عمران خان کے وکیل دونوں مل کر فیصلہ کریں کیا کرنا ہے۔ عدالت نے 6 اپریل تک عمران خان کی ضمانت میں توسیع کر دی۔
